Orð og tunga - 01.06.1990, Síða 96

74
Orð og tunga
• Mann rámar í skeyti um virðisaukaskattinn sem þarf að svara, en man
ekki frá hverjum skeytið kom. Þá er ekkert hægara en biðja tölvuna að
finna öll skeyti með orðliðnum „virðisauk“ eða skammstöfuninni VSK. Ef
sú leitarlýsing reynist of rúm má þrengja lýsinguna með dagsetningu eða
tilgreina á hvaða árshelmingi eða ársfjórðungi skeytið barst.
Hér eru aðeins nefnd örfá dæmi um þá hagræðingu sem öflugt skrifstofukerfi
hefur í för með sér við rekstur nútímafyrirtækis.
7 Lokaorð
Tölvan kemur engu til leiðar sjálf. Hún er verkfæri eins og hamar og sög, eða
e.t.v. frekar eins og bifreið. Hegðan tölvu ræðst af kerfinu og þeim hugbúnaði
sem hún stjórnast af. Tölvukerfi eru misaðgengileg, sum leika í höndurn manns
í fyrsta skipti, önnur eru óþjál. I sumum eru innbyggðar leiðbeiningar, í öðrum
ekki.
Þjál kerfi með innbyggðum leiðbeiningum auka afköst og stuðla að vinnu-
sparnaði. Þau kerfi sem IBM á Islandi hefur verið að þýða eru búin þeim eigin-
leikum.
Mér hefur þótt ákaflega ánægjulegt að eiga aðild að þýðingastarfsemi IBM á
Islandi og Orðabókar Háskólans allt frá því er hún hófst árið 1984.
Mig langar til að nota tækifærið og þakka samstarfsmönnum mínum hjá
Orðabókinni fyrir vasklega framgöngu við þýðingarnar. Skyldurækni, árvekni og
nákvæmni eru orð sem koma í hugann þegar litið er til baka yfir það ágæta starf
sem starfsmenn Orðabókar Háskólans hafa lagt af mörkum.
Starfsmenn Orðabókarinnar hafa vissulega gert sér grein fyrir þeirri ábyrgð
sem fylgir því brautryðjandastarfi sem hér er um að ræða. Sá orðaforði og það
málfar sem mótast við þýðingarnar á eftir að verða ráðandi í máli manna um
tölvunotkun urn ókomna tíð og hafa þannig veruleg áhrif á framvindu íslenskrar
tungu.