Ægir - 01.07.2016, Qupperneq 102

102
Vestmannaeyjahöfn er í hópi um-svifamestu hafna landsins og sem löndunarhöfn ein sú stærsta. Hún
telst vera svipuð að stærð og Hafnarfjarð-
arhöfn og Akureyri. Andrés Þ. Sigurðsson,
hafnarstjóri í Vestmannaeyjum, segir að
tekjur hafnarinnar séu þó allt öðru vísi
samsettar en bæði í Hafnarfirði og Akur-
eyri. Í Vestmannaeyjum ráðist þær að
mestu leyti af aflagjöldum. „Jafnvel þótt
komum skemmtiferðaskipa hafi fjölgað
spila þau ekki jafn stórt hlutverk í tekjum
hjá okkur. Það eru minni skemmtiferða-
skipin sem komast hingað inn en stærri
skipin verða að liggja fyrir utan og ferja
farþegana inn,“ segir Andrés.
Mikill útflutningur
Vestmannaeyjahöfn getur tekið inn skip
sem eru allt að 170 metrar á lengd en
lengri skipin komast ekki inn. Tekjuöflun
hafnarinnar er því nátengd sjávarútvegi
og hefur lítið breyst í þeim efnum allt frá
upphafi vega. Mikill útflutningur er frá
Vestmannaeyjahöfn. Þar er um að ræða
unnar sjávarafurðir sem fara á markað í
Evrópu og víðar.
„Höfnin á sér talsvert langa sögu. Fyrsta
vetrarvertíðin í Eyjum var 1908 og þá fóru
menn strax upp úr því að bæta hafnarað-
stöðuna. Á milli 1920 og 1930 hófust menn
handa við gerð hafnargarðanna sem var
mikið og erfitt verk. Menn voru meðvitaðir
um það að byggð í Eyjum myndi ráðast af
góðri hafnaraðstöðu. Höfnin er anddyrið
að samfélaginu hér í Eyjum og allt at-
hafnalíf hér snýst í kringum höfnina. Á því
verður engin breyting á næstunni,“ segir
Andrés.
Iðandi mannlíf við höfnina
Andrés segir Vestmannaeyjabæ þannig í
sveit settan að stækkunarmöguleikar
hafnarinnar eru ekki miklir. Landsvæði við
höfnina er fullnýtt og hvergi lausa lóð að
finna. Þó hafi verið talsverðar fram-
kvæmdir við höfnina undanfarin ár en nú
er ekkert ónumið land sem stendur til
boða. Hugsanlegt væri að byggja eitthvað
austur á nýja hraunið en ekki eru fyrir-
liggjandi áætlanir um það. „Þá hafa menn
verið að velta upp þeim möguleika að
reisa stórskipahöfn við Eiðið en það yrði
mjög dýr framkvæmd og ólíklegt að ráðist
verði í hana á næstunni. Þar yrði að setja
garða út en við fengjum ekki mikið bygg-
ingarland út úr þeirri framkvæmd.“
Þótt skemmtiferðaskipin vegi ekki mik-
ið í heildartekjum hafnarinnar segir Andr-
és aukna komu þeirra til Eyja ánægjulega.
Allt mannlíf við höfnina og í Eyjum taki
stakkaskiptum og talsverðar aðrar tekjur
skapast fyrir bæjarbúa. Á þessu ári koma
um 40 skemmtiferðaskip til Vestmanna-
eyja en í fyrra komu 31 skip. Fyrir tíu árum
þótti gott ef komur skemmtiferðaskipa
voru tólf.
Stórbrotin innsigling
Andrés segir að innsiglingin að Vest-
mannaeyjahöfn veki mikla athygli útlend-
inga enda óvíða þar sem sigla þarf jafn ná-
lægt klettum á leið til hafnar. Um er að
ræða eina stórbrotnustu innsiglingu á Ís-
landi og þyki erlendum ferðamönnum
hún afar tilkomumikil.
Fyrir eldgosið í Heimaey 1973 var aust-
anáttin oft vandamál í innsiglingunni en
það lagaðist eftir gos. Engu að síður geti
innsiglingin verið varasöm og helgast það
af því að hún er þröng og skipin hafa
stækkað mikið á umliðnum árum.
„Við erum komnir að mörkunum varð-
andi stærð skipa. Gámaskipin eru 140
metra löng og fara héðan fullhlaðin svo
það má ekkert út af bregða. Vindur er
vandamál hér eins flestir vita og getur ver-
ið mjög erfitt að athafna sig með stór skip.
Það er kröpp beygja í innsiglingunni og
svo er snúningssvæðið innan hafnar tak-
markað. Við getum ekki snúið stærri skip-
um en 150-160 metra löngum.“
Höfnin anddyri samfélagsins í Eyjum
Skemmtiferðaskipið Discovery í stórbrotinni innsiglingunni að Friðarhöfn.
Andrés Þ. Sigurðsson, hafnarstjóri í Vestmannaeyjum.
vestmannaeyjar.is