Ritið : tímarit Hugvísindastofnunar - 01.01.2013, Blaðsíða 204

204
heimspekinnar, til dæmis með því að láta nemendur í heimspekinám-
skeiðum ekki bara lesa efni eftir karlheimspekinga og með því að hafa
konur sýnilegar á heimspekiráðstefnum. Það er merkilega algengt að sjá
auglýsta heimspekiráðstefnu þar sem allir boðsfyrirlesararnir eru karlkyns
og á blogginu Feminist Philosophers hefur verið skorin upp herör gegn þess-
ari „hefð“ með átakinu Gendered Conference Campaign.37 Sem gott dæmi
um vefsíðu sem er helguð því að brjóta upp staðalímyndir má nefna Looks
Philosophical38 þar sem heimspekingar eru hvattir til að senda inn myndir
af sér með stuttri umsögn um sjálfa sig. Eins er mikilvægt að huga að því
með hvaða hætti umræður eru stundaðar, hvort þær eru til þess fallnar að
gera öllum kleift að vera með. Og svo þurfa heimspekingar að sjálfsögðu í
sífellu að endurskoða sýn sína á heimspeki og takast á við spurningar eins
og „Hvað eigum við að flokka sem heimspeki?“ og „Með hvaða hætti vilj-
um við stunda heimspeki?“
Þessi listi er engan veginn tæmandi, enda hef ég tæpast öll svörin á
reiðum höndum. Hið mikilvæga er að heimspekingar vinni saman að því
að gera heimspekina að grein sem laðar að sér fjölbreyttan hóp og fólk
getur lagt stund á laust við kvíðahnút í maganum.39
37 http://feministphilosophers.wordpress.com/gendered-conference-campaign/
38 http://looksphilosophical.tumblr.com/
39 Þessi grein er unnin út frá fyrirlestri sem ég hélt á vegum Rannsóknastofu í kvenna-
og kynjafræðum við Háskóla Íslands vorið 2012. Ég vil þakka þeim sem sóttu
fyrirlesturinn og margar góðar ábendingar sem þar komu fram. Eins vil ég þakka
Gunnþórunni Guðmundsdóttur, Nönnu Hlín Halldórsdóttur, Sigríði Þorgeirs-
dóttur, Þresti Helgasyni og ritrýnum Ritsins fyrir ábendingar og yfirlestur.
eyJa MaRGRét bRynJaRsdóttiR