Ægir - 01.07.2016, Qupperneq 96

Hitaveita er ein af þeim nýjungum sem skipum í Grindavíkurhöfn verður boðið upp á eftir umtals-
verðar hafnarbætur sem eru nú framund-
an hjá Grindavíkurhöfn. Í boði verða betri
tengingar á rafmagni og kerfi sem fylgist
með notkun þess og ístaka verður á fleiri
stöðum en nú er. Allt kemur þetta með
endurgerð Miðgarðs, en breytingar á hon-
um munu taka tvö til þrjú ár.
„Það verkefni er nú á þeim stað að ver-
ið er að ljúka við útboðsgögnin sem Vega-
gerðin er að vinna. Ekki er mikið eftir af
því og þá á að vera hægt að bjóða verkið
út. Framkvæmdin er mjög dýr og fer því
inn á fjárlög. Grindavíkurbær hefur boðist
til þess að fjármagna verkið þangað til rík-
ið kemur inn með sitt framlag. Ætli heild-
arupphæðin sé ekki um 1,3 milljarðar
króna. Líklega gæti verkið farið í útboð um
miðjan næsta mánuð og það fer svo eftir
því hver verkefnastaðan verður hjá verk-
tökum hvenær verkið hefst, en ég myndi
helst vilja byrja strax fyrir áramótin,“ segir
Sigurður Arnar Kristmundsson, hafnar-
stjóri í Grindavík.
Þarf að dýpka höfnina
„Þetta verður væntanlega gert í tveimur
áföngum, þannig að bryggjan sé ekki öll
undir í einu á sama tíma. Ætlunin er að
byrja vestast á Miðgarði og færa okkur svo
til austurs. Þá er gert ráð fyrir að verkið
taki tvö til þrjú ár. Svo þarf að dýpka höfn-
ina en við erum ekki búnir að fá pening í
það ennþá. Dýpkunin er alveg óhjá-
kvæmileg svo þetta dýra mannvirki nýtist
fullkomlega. Við viljum hafa dýpið 8 metra
við kantinn til þess að mæta þörfum flot-
ans og gerum ráð fyrir að djúprista á nýj-
um bátum verði meiri en þeim sem eldri
eru.“
Hafnarstjórn var með undirbúningshóp
sem var skipaður af viðskiptalífinu á
staðnum, hafnaryfirvöldum og Vegagerð-
inni, til að móta hvernig best væri að hafa
aðstöðuna eftir framkvæmdirnar. Það felst
meira í því að endurbyggja bryggju en
reka niður stálþil og fylla upp með því.
Skip tengd við hitaveitu
„Við viljum hafa aðstöðuna þannig að þeg-
ar skipin leggjast að sé bryggjan alltaf
snjólaus, það er að í henni verði hitalögn,
utan til að minnsta kosti. Við viljum að
hægt sé að tengja skipin við heitt vatn til
að halda í þeim hita í staðinn fyrir að
keyra ljósavélar á landrafmagni sem er
fimm sinnum dýrara. Við ætlum til dæmis
að taka þessa hitaveitu um borð í hafn-
sögubátinn okkar, Bjarna Þór, og jafnvel í
björgunarbátinn Odd. V. Gíslason. Þetta
eru bátar sem liggja mjög mikið og taka
ótrúlega mikinn straum með miklum
kostnaði.
Þennan möguleika viljum við líka bjóða
skipum sem liggja hér einhvern tíma, en
einnig snýst þetta um að vera umhverfis-
vænn og vera ekki að menga að óþörfu og
gera þetta á sem hagkvæmastan hátt.“
Grindavíkurhöfn er einnig að skoða
landtengingar á rafmagni með kerfi sem
heitir Tactica. „Þetta er tækni sem verið er
að þróa til að hafa eftirlit með raforku-
notkuninni á netinu. Þá geta menn séð
hversu mikill straumurinn er hverju sinni.
Eins gefur kerfið viðvaranir ef straumrof
verður og ef álagið verður of mikið. Þetta á
einnig að hjálpa til við að stilla raforku-
notkun í hóf.“
Bjóða hitaveitu
um borð í skipin
Sigurður Arnar Kristmundsson, hafnarstjóri í Grindavík.
„Við viljum að hægt sé að tengja
skipin við heitt vatn til að halda í
þeim hita í staðinn fyrir að keyra
ljósavélar á landrafmagni sem er
fimm sinnum dýrara.“
grindavik.is/hofnin
96