Morgunblaðið - 01.12.2017, Síða 34

34 Jólablað Morgunblaðsins
Ris a la mande: vegan, 4-5 skammtar
Hollt og gott, líka um jólin. Galdurinn er að sjóða
brúnu hrísgrjónin tvisvar og í seinna skiptið í kókos-
mjólk. Berið ris a la mande fram með kirsuberjasósu lag-
aðri úr niðursoðnum lífrænum kirsuberjum sem fást
meðal annars í Heilsuhúsinu. Einnig er möguleiki á að
panta bæði Ris a la mande og sósu í Yogafood.
4 dl stutt brún hrísgrjón
10 dl vatn
1 l kókosmjólk t.d. frá Rude Health
½ tsk. vanilluduft eða fræin úr einni vanillustöng og
sjóða börkinn með
½ tsk. sjávarsalt/flögur
hnífsoddur svartur pipar
4-5 msk. xylitol, milt hunang eða 5-7 dropar
vanillustevía
200 g möndluflögur
2 dósir kókosmjólk (geyma í ísskáp) sem gefur ca 4 dl
kókoshneturjóma (efsta þykka kremið í dósinni). Af-
ganginn má t.d. nota í þeyting. EKKI kaupa „light“ eða
fituskerta. Í staðinn fyrir kókosrjóma má nota Oatly-
hafrarjóma.
Kirsuberjasósa
500 g niðursoðin kirsuber í krukku
1 dl appelsínusafi
1 msk. örvarrót eða maísmjöl og smávatn að hræra
því í
vanillustevía eða annað sætuefni.
Skolið grjónin vel og vandlega í volgu vatni og sjóðið
þau síðan í potti með loki í 10 dl af vatni í 40 mín. Þegar
suðan kemur upp lækkið hitann undir pottinum og pass-
ið að ekki brenni við.
Þegar grjónin eru soðin er kókosmjólkinni bætt í
grjónapottinn ásamt vanillu, vanilluberki, pipar og salti
og suðan látin koma upp enn einu sinni. Lækkið hitann
og leyfið grjónagrautnum að krauma með loki á þar til
hrísgrjónin hafa sogið í sig alla kókosmjólkina. Bragð-
bætið með því sætuefni sem þið kjósið að nota. Blandið
möndluflögunum í grautinn og kælið hann svo. Þegar
grauturinn er orðinn kaldur blandið þá kókosrjóma eða
hafrarjóma vel en samt varlega saman við grautinn.
Hann á að vera léttur en ekki klístraður og þykkur.
Grauturinn er borinn fram í fallegri skál og athuga að
fela góða afhýdda möndlu í einni skálinni. Muna svo að
vera tilbúinn með möndlugjöf!
Kirsuberjasósa: Hita kirsuberin í eigin safa í potti
ásamt appelsínusafanum. Bragðið og sætið ef þarf með
smá stevíu eða því sem þið viljið nota. Þykkið sósuna
með maísmjöli aða örvarrót á meðan þið hrærið varlega í
pottinum. Varlega því við viljum ekki skemma og merja
berin. Og passa að sósan verði ekki of þykk heldur!
Margt að vara sig á hér! Sósan er borin fram heit eða
köld með ris a la mande.
Jólalegt rauðkálssalat með appelsínum
og apríkósum: Vegan, án viðbætts sykurs
Rauðkál verður maður af hafa á jólunum. Það er bara
þannig. Hérna nota ég það í hráu maríneruðu salati sem
er þrumugott meðlæti með alls konar mat, hvort sem er
reyktu kjöti, lambakjöti eða hnetusteik. Appelsínusafinn
og eplaedikið mýkja rauðkálið og því engin ástæða til að
sjóða það. Geymslutíminn er næstum ein vika í lokuðu
íláti í kæli.
1 stórt rauðkálshöfuð (íslenskt) sneitt mjög þunnt og
fínt í matvinnsluvél
Fínrifinn börkur af einni lífrænni appelsínu og safinn
úr tveimur
20 apríkósur (þessar brúnu lífrænu, EKKI þessar fölu)
skornar í þunnar sneiðar
5 g fersk engiferrót, fínhökkuð eða rifin
2 msk. eplaedik
½ tsk. vanilluduft eða skafa innan úr ¼ vanillustöng
1 tsk. kanilduft
¼ tsk. allrahandaduft
¼ tsk. negulduft
½ tsk. kardimommuduft
½ tsk. flögusalt
2 dropar stevía eða ½ msk. hunang
hnífsoddur nýmalaður svartur pipar
Blandið öllu saman, bragðið og metið hvort vantar
meiri sætu eða salt. Setjið í skál með loki inn í ísskáp í að
minnsta kosti 3 klst. áður en borið er fram. Takið út hálf-
tíma áður svo það sé ekki ískalt.
Sæt kartöflumús: vegan,
fyrir 5-6 sem meðlæti
Brúnaðar kartöflur eru góðar, því er ekki að neita. En
óneitanlega mikill sykur og sterkja í einni lotu. Það er
hægt að hafa kartöflurnar sætar án sykurs og nota sætar
kartöflur í staðinn fyrir karamelluna. Sætar kartöflur er
einfaldlega hægt að skræla, skera í báta og baka í 180°
heitum ofni í 30 mín. með smá olíu og rósmarínkryddi og
máið er leyst. Annar möguleiki er að búa til rótarmús,
næstum því eins og við gerum í Yogafood. Svaka góð.
1 kg sætar kartöflur, skrúbbaðar og skornar í grófa
teninga
2 hvítlauksrif, marin
2-3 dl vatn
5 dropar fiskisósa (má sleppa ef vegan og nota 1 tsk.
tamari-sósu í staðinn)
½ msk. ný timíanlauf
¼ tsk. vanilluduft
½ tsk. rifin múskathneta
½ tsk. kanilduft
fínrifinn börkur og safi úr einni lífrænni appelsínu
1-3 msk. extra jómfrúarólífuolía eða smjörklípa
1 tsk. sjávarsalt
nýmalaður pipar
Setjið kartöflur, hvítlauk, vatn, fiskisósu, timían, van-
illu, múskat og kanil í pott og látið suðuna koma upp.
Lækkið hitann og látið krauma þar til kartöflurnar eru
alveg komnar í mauk. Það tekur 20 til 30 mín. Munið að
hræra svo að ekki brenni við. Ef til vill þarf meira vatn.
Maukið kartöflurnar með sleifinni og hrærið vel. Bætið
appelsínusafa og berki við og hrærið áfram. Það er hægt
að nota töfrasprota til að létta verkið. Að lokum er
bragðbætt með ólífuolíu, salti og pipar.
Eftirréttir geta vel
verið sætir og
hollir samtímis.
Hollt og gott að hætti Þorbjargar
www.heklaislandi.is - S: 6993366
Íslensk hönnun
falleg gjöf fyrir þá sem þér þykir vænst um