Tímarit Máls og menningar - 01.09.2012, Page 24

H a u k u r I n g va r s s o n
24 TMM 2012 · 2
menna Íslands með því að halda þeim veislu.1 Hin eiginlega kveikja sögunnar
er tungumál aldarinnar sem Sölvi Björn kannar og bregður á leik með. Áhrif
af þessu tagi eru stef í höfundarverki hans en áður skrifaði hann t.a.m. skáld­
söguna Fljótandi heimur (Mál og menning 2006) þar sem innblásturinn
kom m.a. frá verkum japanska rithöfundarins Harukis Murakami. Hann
hefur líka skrifað ljóðabálk þar sem næturbrölti íslensks ungskálds á börum
Reykjavíkur er lýst undir tersínu­hætti. Og nú segist Sölvi Björn enn og aftur
standa á tímamótum.
Með flugvél beint til Frakklands fer
Eftir stúdentspróf lagðist Sölvi Björn í ferðalög: „Ég flutti til Frakklands sem
gerði mér kleift að lifa mig inn í 19. aldar skáldskap sem ég hafði sökkt mér
í árin á undan. Ég byrjaði á því að fara í tungumálanám til Montpellier og
svo til Parísar þar sem ég leigði þvottakonuherbergi í risi hjá ágætri konu.
Þarna rættist sem snöggvast draumsýn um að vera bóhem í útlöndum og
þýða sonnettur og yrkja ljóð yfir rauðvínstári og vindlingi. Um leið kviknaði
sú árátta að vilja búa erlendis og leita sér nýrrar lífsreynslu sem víðast og það
varð nánast að söfnunaráráttu að flytja á milli landa og kynna sér nýja staði
og nýja menningarheima og komast í tæri við ólíkan hugsunarhátt – gera
atlögu að heimsmennskunni. En ég á mína fjölskyldu hér og var alltaf með
annan fótinn heima enda stóð aldrei til að loka á eftir sér hurðinni og skella í
lás. En þetta hefur örugglega haft heilmikil áhrif á mig til frambúðar.“
Þýðingar eru snar þáttur í höfundarverki Sölva Björns og segja má að
hann hafi fyrst vakið verulega athygli sem þýðandi árið 2000 þegar Mál og
menning gaf út allar sonnettur enska skáldsins Johns Keats (1795–1821) í
hans þýðingu: „Þetta var ljóðlist sem ég las í menntaskóla, af einhverjum
sökum datt ég ofan í Keats miklu fremur en önnur skáld. Löngunin til að
skrifa skáldskap rann saman við þennan lestur og ég byrjaði að prófa mig
áfram með þýðingar á þessu efni. Þegar ég fór til útlanda í fyrsta sinn var það
á stefnuskránni að reyna að koma öllum sonnettunum á eina bók og það var
mjög skemmtilegt verkefni og góð æfing með tungumálið að móta einhvers
konar form og finna sig hugsanlega sem skáld án þess að stíga beinlínis fram
á sjónarsviðið sem slíkt.“
Í BLÁMA ÞINNA AUGNA EFTIR JOHN KEATS
Í bláma himins ber að líta hvar
sér bústað tunglið fann, og sólin höll.
Æ blikar Venus blítt á kvöldin þar,
æ brenna þar í gulli skýin öll.