Tímarit Máls og menningar - 01.03.2013, Síða 131

E n d u r h e i m t b r o t ú r g ö m l u s ö g u l j ó ð i n ý j u
TMM 2013 · 1 131
Berklar: Þó í hófi – því ekki viljum við glata trúverðugleika sögunnar.
Spönn: En hvar finnum við gelgjurnar sjálfar? Og sóknarbörnin öll?
Spelka: „Öll“ væri ofrausn svo þunnskipaðri sögu, látum hér nægja nokkur.
Hnúður, þér mun hæfa Davíð einn, uppnefndur „englaprump“, svo yfirmáta
heilagur og hreinn að hreinan viðbjóð vekur.
Hnota: Hann elskar allt …
Allir: Öööööö!
Spelka: Hann umber allt!
Allir: Æææææl!
Berklar: Og skilur hvorki skjall né skæting rætinn!
Hrífa: Nei, hættu nú!
Hnota: Og vill svo vel að vandræði hljótast af!
Hrífa: Ég þoli ekki meir! Hverjir koma aðrir hér við sögu?
Berklar: Með honum ganga til messu meyjar tvær og einhverjir fleiri sem óþarfi
er upp að telja.
Hnota: Og þessar tvær? Hvað með þær? Eigum við? Eða viltu aðrar velja?
Berklar: Engar aðrar. Þið Spelka gætuð spjarað ykkur sem … sem Hervör og
Stella!
Spelka: Stella hér! Eitt gasalegt glæfrakvendi, sem ennþá er sakleysisblæju sveipað
er saga hefst, en ólmast þar undir sem flóðgátt … á fengitíma!
Berklar: Hervör henni til höfuðs. Svo grjóti hlaðin og jörðu bundin sem bikkjan
bræðranna á Bakka.
Spelka: Ofhlaðin hljómar sú trunta jafnt steinum sem stuðlum, bróðir minn
Berklar!
Berklar: Vel má það vera en víst er hún ekki trunta, jafn göfug og gæflynd sem
hún reynist er fram í sögu sækir og veður gerast válegri.
Spelka: Styttum nú formála þennan sem fylla mun söguna alla ef fleiri véla þar
um!
Berklar: Já, hefjum þá helgu stund sem boðað var til og rekjum úr guðsmanni
garnir.
I
Heimir: Og vers … 14. Sáðmaður gekk út að sá. Já. Og hvað var það fleira.
Frelsarinn. Kannski. Það var nú meiri kallinn. Ha! Ef auga þitt hneykslar
þig … þá rífðu það úr og allt. Hver las heima? Ég refsa þeim grimmilega
sem ekki las heima. Í Drottins nafni mun hann stikna eins og steikin í ofni
maddömunnar.
Davíð: Ég las heima!
Heimir: Það var svosem auðvitað. Meiri andskotans samviskusemin alltaf. Þið
hin sleppið með áminningu. Aldanna skaut og það svæði allt. Vorum við búin
að syngja? Og hann lét slátra kálfi og bera fram dýrlegar veitingar. Hvað er
klukkan? Davíð, þú lest Orðið.
Davíð: Stöðugt fjölgar stríðsmönnum hans?