Þjóðmál - 01.12.2015, Page 4

ÞJÓÐMÁL vetrarhefti 2015 3
ritstjórnarbréf
Gleðileg jól og farsælt komandi ár
Trúðu á tvennt í heimi,
tign sem æðsta ber.
Guð í alheimsgeimi,
Guð í sjálfum þér.
Trúarjátning þjóðskáldsins Steingríms Thorsteinssonar, úr ljóðinu Lífshvöt, er í senn látlaus
og fögur. Í hraða samtímans og sífellt flóknari heimi þar sem tæknin tekur stundum völdin, er
einfaldleikinn oft kærkominn. Við öðlumst stundarfrið og gefum okkur tíma til að hugleiða
það sem mestu skiptir í lífinu.
Björn Jónsson – Björn í Bæ á Höfðaströnd í Skagafirði – sagði kærleikann grundvöll að öllu
góðu. Í tilefni af áttræðisafmæli Björns átti Morgunblaðið við hann langt viðtal í desember
1982 en Björn var um áratugaskeið fréttaritari blaðsins. Björn sagði meðal annars:
„Ef ég reyni að skýra viðhorf mitt til Guðs, sem í alheimi býr og þá trú sem ég, vesæll
maður, vil hafa, þá er auðsvarað að kærleikann tel ég grundvöll að öllu því góða sem við
eigum að tileinka okkur í daglegu líferni, því að kærleikurinn er hinn sanni Guð í alheimi
og það besta í okkur sjálfum.
Í flestum tilfellum er kærleikurinn fyrsta kenndin sem barnið skynjar, það er til móður
sinnar, og út lífið er það þessi guðdómlega kennd, sem er undirstaða alls góðs.“
Viðhorf Björns í Bæ til lífsins og þess sem er mikilvægast, kann sumum að þykja barnslegt
og vera merki um einfeldningshátt hins trúgjarna. Við hin snúum okkur til Steingríms og
förum með fjórar ljóðlínur sem lýsa trú okkar betur en flest annað.
Þjóðmál óska lesendum sínum og landsmönnum gleðilegra jóla og farsældar á nýju ári.