Andvari - 01.01.2013, Blaðsíða 89

andvari
KREDDULAUS TEMPERAMENTSMAÐUR
87
og ávarpa þar samkomu þar sem voru um 500 manns.12 Honum virðist hafa
verið vel tekið hvarvetna og ekki síst af prestum sem opnuðu fyrir honum
kirkjur sínar. Þegar hann fór af landi brott í fyrra skiptið fékk hann þakkar-
bréf frá biskupi og helstu embættismönnum í Reykjavík með undirskriftum
fimmtíu manns.13Af ævisögu Sharps sést að þeir Eiríkur hafa haldið sam-
bandi eftir samveruna á Islandi sumarið 1863. Hann gaf Eiríki góð meðmæli
þegar hann sótti um stöðu bókavarðar við háskólann í Cambridge og má ráða
af grein Guðjóns Sigþórs Jenssonar bókasafnsfræðings um Eirík að þau með-
mæli hafi verið þung á metunum.14
Kvekarar leggja áherslu á innra trúarlíf, trúfrelsi, persónulega trúarsann-
færingu og innblástur heilags anda og tortryggja allt sem hindrar að trúað fólk
geti tekið mið af innri uppljómun og fylgi henni eftir í tilbeiðslu og daglegu
lífi. Þetta virðist hafa átt vel við Eirík sem var umhugað um frelsishugsjónir
allt frá árunum í Lærða skólanum í Reykjavík þegar hann hreifst af þeim
frelsisstraumum sem fóru um Evrópu og þar með talinni Reykjavík.15
I ævisögu Sharps er birt minningagrein eftir Eirík um Sharp, sem lést árið
1897. Þar er athyglisverð mannlýsing sem ber þess vott að Sharp hafi orðið
Eiríki fyrirmynd í trúarefnum. Þetta er hástemmd persónulýsing og þótt ekki
væri nema helmingurinn sannur af því sem þar er sagt þá væri það samt vís-
bending um andleg tengsl þessara manna. Eiríkur átti til að ausa lofi þá sem
honum líkaði vel við en ávallt var eitthvert sannleikskorn í því. Vitnisburður
Eiríks um Sharp er eftirfarandi:
Isak Sharp kom mér fyrir sjónir sem hinn fullkomni kristni maður. Eftir að hafa þekkt
hann í þrjátíu og fimm ár er það niðurstaða mín að hann hafi verið helgur maður. Fyrir
það fyrsta var maðurinn hinn fullkomni heiðursmaður og það var honum eðlislægt. Ég
varð aldrei var við að hann væri í hjarta sínu bitur út í nokkurn mann. Hann hataði hið
illa og gerði það vegna þess að hann þráði hið góða og vegna sorgar yfir því að þurfa
að horfa upp á hugsjón góðleikans afskræmda eða skaddaða. Hjartalag hans var sömu
gerðar og hinn örláti persónuleiki hans og siðgæðisvitund hans var sterk. Persóna hans
var aðlaðandi og kærleiksrík og göfuglyndið ætíð ríkjandi viðmót af hans hálfu. Af
kærleika sonarins laðaðist ég að þessum göfugasta riddara Krists frá fyrsta degi okkar
kynna til æviloka hans og í minningunni geri ég það enn.16
Þessi tilvitnun bendir til þess að Eiríkur hafi beint eða óbeint orðið fyrir trúar-
áhrifum af því að hlusta á og fylgjast með trúboðanum. Þetta má m.a. ráða af
trúarhita hans og því hvernig hann nálgaðist ýmis trúarleg álitamál og félags-
leg viðfangsefni og hugsanlega einnig viðfangsefni í sambandi við biblíuþýð-
ingar. Trúarlíf Eiríks var persónulegt, tilfinningaríkt og óháð sakramentum og
kennivaldi kirkjunnar. Hann bjó yfir ríkri réttlætiskennd og hjálpsemi í garð
annarra, en þetta eru meðal einkenna á trúarlífi og lífstíl kvekara. Það er því
ekki úr vegi að skoða örlítið trúarsamfélag og boðun kvekara.