Tímarit um menntarannsóknir - 01.01.2006, Blaðsíða 6

Ágæti félagsmaður og lesandi.
Tímarit um menntarannsóknir kemur nú út í þriðja sinn. Tímaritið er í stöðugri mótun
og birtir nú auk hefðbundinna fræðigreina viðtal okkar Kristínar Jónsdóttur við Gerði
G. Óskarsdóttur fráfarandi fræðslustjóra og sviðsstjóra Menntasviðs Reykjavíkur.
Gerður hefur í starfi sínu lagt áherslu á að ákvarðanir við stjórn menntamála byggist
á traustum grunni rannsókna. Eins og fram kom í pistli Gretars L. Marinóssonar í
TUM 2005 er markmið tímaritsins ekki síst að stuðla að hagnýtingu rannsókna á
sviði menntunar og þess vegna er forvitnilegt að kynnast reynslu Gerðar af nýtingu
rannsókna við stjórn og stefnumótun í menntamálum.
Fimm fræðigreinar eru birtar, af ólíkum sviðum menntamála. Kristján
Kristjánsson skrifar um vingjarnleika sem dygð í kennslu og beinir þar sjónum að
persónueinkennum kennarans en þau eru ekki síður mikilvægt umfjöllunarefni en
tæknilegir þættir kennslu.
Amalía Björnsdóttir, Börkur Hansen og Ólafur H. Jóhannsson greina frá hlut
kennara í mótun skólastarfs, mati þeirra á faglegu sjálfstæði sínu og skólans eftir
að rekstur og stjórn grunnskóla færðist til sveitarfélaga 1995. Þessir höfundar hafa
áður kynnt niðurstöður rannsókna á áhrifum stjórnkerfisbreytingarinnar á ýmsa aðra
þætti skólastarfs.
Kristín Elva Viðarsdóttir og Sif Einarsdóttir skrifa um áhrif fræðslu á viðhorf
og þekkingu grunnskólakennara á sam- og tvíkynhneigð. Greinin er unnin er upp
úr ritgerð Kristínar Elvu sem valin var besta M.Ed. ritgerðin við KHÍ árið 2006 af
vísindaráði Kennaraháskóla Íslands. Niðurstöður rannsóknarinnar benda til þess að
fræðsla af þessu tagi geti haft áhrif.
Berglind Rós Magnúsdóttir skrifar um námshegðun leiðtoga í 10. bekk grunnskóla
af báðum kynjum í ljósi kenningar Bourdieus um menningarauð. Þessi rannsókn er
ekki síst áhugaverð fyrir þær sakir að hún veitir innsýn í ólík viðhorf kynjanna til
náms, en kynjamunur er sem kunnugt er mikill á samræmdum prófum.
Loks er í grein Guðnýjar Guðbjörnsdóttur greint frá rannsókn á lestrarvenjum ungs
fólks og niðurstöðurnar settar að nokkru leyti í samhengi við svipaðar rannsóknir frá
ólíkum tímum um lestrarvenjur ungs fólks og fullorðinna.
Ritstjórnin vill þakka ritrýnum fyrir sitt framlag og Námsmatsstofnun fyrir aðstoð
við útgáfu tímaritsins.
Ragnar F. Ólafsson
Frá ritstjóra
1