Tímarit um menntarannsóknir - 01.01.2006, Side 94

89
Tímarit um menntarannsóknir, 3. árgangur 2006
tilbúið til að ráða arkitektinn fyrirfram, en
fulltrúar arkitektafélagsins tóku þátt í ferlinu
og svo var alútboð. Arkitektar sem urðu
hlutskarpastir í alútboðinu áttuðu sig greinilega
ekki alveg á niðurstöðum undirbúningshópsins
þannig að við fengum ekki nákvæmlega þá
byggingu sem beðið var um. Þeir áttuðu sig
t.d. ekki á óskinni um að hafa stórt miðjurými
í skólanum, svipað og í Ingunnarskóla, en létu
langan gang skera í sundur vinnusvæðin og
salinn.
Hvernig brást hópurinn við, þeir sem voru
búnir að taka þátt í ferlinu?
Það voru auðvitað ekki allir ánægðir, en þar
sem um var að ræða alútboð var mjög erfitt
að breyta, svo nokkru næmi. Arkitektafélagið
leggur áherslu á að það séu samkeppnir um
opinberar byggingar og tók því fremur illa
að ráðinn var erlendur arkitekt til að hanna
Ingunnarskóla. Ég hélt að þegar Ingunnarskóli
væri risinn myndi allt breytast. Hann var
reyndar ekki alveg risinn þegar Korpuskóli
var hannaður. Það eru enn að rísa nýjar
skólabyggingar sem eru í raun hannaðar eftir
sömu prinsippum og Miðbæjarskólinn, sem er
100 ára gömul bygging.
Þetta ferli Ingunnarskóla hefur líka haft áhrif
á umræðuna um þátttöku allra mögulegra í
mótun skólastarfs.
Já, þarna voru margir aðilar saman komnir,
ekki bara skólafólk. Mér finnst svo mikilvægt
að notendur þjónustunnar komi að því að móta
stefnuna, eins og ég hef áður sagt, og hef alltaf
lagt mjög mikið upp úr því að hafa t.d. foreldra
með.
Þetta eru sambærileg vinnubrögð og nú er
farið að viðhafa við undirbúning skipulags og
nefnt hefur verið íbúaþing. Það voru haldin
mörg íbúaþingin á vegum Fræðslumiðstöðvar
Reykjavíkur!
Ingunnarskóli var hannaður utan um það
sem við köllum nú einstaklingsmiðað nám.
Já, það var einróma niðurstaða starfshópsins.
Þróun í átt til einstaklingsmiðað náms er á
miklu skriði í Reykjavík og mjög margt verið
að gera í skólunum á ýmsum sviðum í þeim
efnum. En þetta er langtíma verkefni sem unnið
er á forsendum hvers skóla fyrir sig. Þróunin er
á mjög viðkvæmu stigi núna, það sem búið er
að byggja upp úti í skólunum gæti vel hrunið.
Þróunarstarf gengur oft til baka ef ekki er
haldið utan um það og mikill stuðningur er frá
yfirstjórn. Ef þróunarstarfi er ekki fylgt eftir af
festu, getur þróunin hæglega fjarað út.
ALÞJÓÐLEG PRÓF
Hvernig finnst þér þátttaka Íslands í alþjóð-
legum rannsóknum hafa nýst, t.d. TIMSS og
PISA? Nýtast þær í starfi fræðslustjóra?
Já, þær eru mjög mikilvægar og alþjóðlegt
samstarf almennt. Það gefur mikið, opnar nýjar
víddir. Gagnaöflun eins og PISA og TIMSS
skiptir okkur miklu máli og við eigum að
notfæra okkur þetta samstarf. Ég vona bara að
Námsmatsstofnun fái tækifæri til þess að vinna
meira úr þessum gögnum, en það sem hefur
verið unnið er mjög mikilvægt.
Í þessum rannsóknum eru spurningar lagðar
fyrir stjórnendur, ekki aðeins nemendur. Sá
samanburður milli landa er mjög gagnlegur.
Einnig finnst mér jákvætt að prófin eru almenn
og ekki bundin við ákveðið námsefni, eins og
t.d. samræmdu prófin hjá okkur hér á landi
hafa verið. Þessi próf kanna getu og þjálfun
nemenda almennt til að bjarga sér í lífinu, ef
svo má segja.
En hafa þessar rannsóknir hagnýtt gildi?
Er kannski meiri úrvinnslu þörf svo
niðurstöðurnar verði hagnýtar?
Þær geta að sjálfsögðu haft mikið hagnýtt gildi.
Ég get nefnt sem dæmi að mér hefur oft þótt
gagnlegt að vitna í það sem kom fram í PISA,
að breytileikinn innan skólanna hjá okkur hér
á landi er miklu meiri en á milli þeirra. Þetta
er mjög sérstakt fyrir Ísland og á reyndar við
um hin Norðurlöndin líka. Þessi lönd eru ólík
öðrum löndum hvað þetta varðar. Við hefðum
ekki vitað þetta nema vegna PISA. Það var
mjög mikilvægt að fá þessar niðurstöður og við
getum nýtt þær við stefnumörkun um þróun
skólakerfis okkar.
Viðtal við Gerði G. Óskarsdóttur