Ráðunautafundur - 20.02.1996, Síða 28

20
Ríkið kosti áfram tiltekið launahlutfall héraðsráðunauta. Annar almennur rekstur og
sameiginlegt leiðbeiningastarf verði kostað af sjóðagjöldum, en jafnframt tekin upp í auknum
rnæli gjaldtaka fyrir leiðbeiningar og aðra þjónustu, sem veitt er á einstaklingsgrundvelli.
Til álita kemur, hvort aðrir gjaldstofnar henti eins vel eða betur en sjóðagjöld af af-
urðum, sbr. t.d. landskattinn í Danmörku.
LOKAORÐ
Hér hefur verið velt upp hugmynd að breyttu skipulagi rannsókna og leiðbeininga í land-
búnaði. Sú hugmynd er ekki ný; hún hefur skotið upp kollinum áður og vakið umtal án þess að
verða að veruleika.
Ýmislegar aðstæður valda því að nú er rétt að reifa nýjar hugmyndir og dusta rykið af
öðrum. Aðstæður í landbúnaði krefjast þess að fagþjónustan standi sig; boðorð dagsins er
sparnaður, bæði af hálfu ríkisins og bænda sem kosta þessa þjónustu. Uppstokkun á sér stað í
félagskerfi bænda samkvæmt kröfum um hagkvæmni og skilvirkni.
Sú hugmynd sem hér hefur verið rædd er ekki endilega sú rétta, og kerfisbreytingar einar
og sér leysa ekki allan vanda. Mestu varðar að þeir sem vinna þau störf sem hér um ræðir geri
sér grein fyrir tilganginum, í hvers þjónustu þeir eru og hafi víðsýni til að horfa framhjá
þrengstu eiginhagsmunum, og leggja það eitt til sem best má gagnast landbúnaðinum og
þjóðfélaginu.