Tímarit Máls og menningar - 01.09.2017, Side 46
46 TMM 2017 · 3
Eka Kurniawan
Ekki pissa hér!
Þórdís Helgadóttir þýddi
Um leið og hún opnaði bíldyrnar fyrir framan búðina sína stakk hlandlyktin
hana í nasirnar. Lyktin kom frá lága milliveggnum á litla bílastæðinu. Unga
konan, Sahsa, var hérumbil búin að æla. Hún rauk út og hálfhljóp í áttina að
búðardyrunum, tók úr lás og flýtti sér inn.
Hlandlyktin elti hana eins og dekraður hundur – þrátt fyrir stóra hand-
skrifaða skiltið sem hún var búin að hengja út á vegginn: „Ekki pissa hér!“
Hún gerði sér í hugarlund að á hverri nóttu kæmi sá sem í hlut ætti rétt fyrir
sólarupprás og pissaði hæstánægður beint á skiltið.
Hún nöldraði við Marjan, einn starfsmanninn í búðinni: „Ég ætla að vona
að Guð brenni af honum tillann.“
Marjan hló bara og vatt sér svo eins og venjulega í að þrífa illa þefjandi
hornið á bílastæðinu. Og hún lét ekki nægja að skvetta smá vatni yfir það
heldur notaði hún vatnsblöndu með lyktareyðandi ilmefnum. Hlandlyktin
varð að vera á bak og burt áður en þær opnuðu verslunina, rétt fyrir klukkan
sjö. Ekki bara af því að lyktin gerði Söshu óglatt. Hitt var öllu verra, að það
mátti bóka að hún myndi fæla hugsanlega viðskiptavini í burtu.
Alveg síðan hún tók þetta verslunarrými á leigu og opnaði litlu verslunina
sína hérna hafði hún stöðugt verið í vondu skapi. Typpið á karlmönnum var
til vandræða um allan heim, kvartaði hún og kom Marjan til að hlæja. Það lék
enginn vafi á því í hennar huga að sá sem stundaði það að míga á bílastæðið
var manneskja með typpi.
„En áður en Guð brennir af honum tillann, þarf fyrst að kenna honum
smá mannasiði.“
***
Maðurinn hennar var farinn að bíða eftir henni á rúminu þegar hún kom
fram af baðherberginu. Hún var enn með handklæðið vafið um sig og brosið
á andliti eiginmannsins var hún farin að þekkja vel eftir öll þessi ár – þetta
var brosið sem bauð henni að sofa hjá honum. Hún þoldi ekki þetta bros, en
gat ekkert gert í því. Hún reyndi iðulega að komast hjá kynlífinu, þau gerðu
það ekki oft, en af því að beiðnin var svo sjaldgæf átti hún í vandræðum með
að hafna henni.