Milli mála - 2018, Blaðsíða 137

REBEKKA ÞRÁINSDÓTTIR
Milli mála 10/2018 137
persónur tilheyra þeirri manngerð rússneskra bókmennta sem kölluð
hefur verið „litli maðurinn“. Litli maðurinn gegnir lágu embætti,
gjarnan í neðstu þrepum Virðingarstigans. Hann sinnir starfi sínu
af alúð og leitast við að skapa sér sæmilegt líf þrátt fyrir lítil efni.
Hann er á undarlegan hátt ógæfusamur, vanmáttugur og lítill í sér
og þegar í harðbakkann slær er þessari manngerð flest mótdrægt:
ruddaskapur annarra, niðurlægingin og kerfið allt, og enginn og
ekkert kemur honum til hjálpar. Þegar hann reynir að andmæla er
það dæmt til að mistakast; litla manninn skortir sjálfstraust, vald
og bakland til að fá sínu framgengt. Hann hopar, missir fótanna og
hverfur af sjónarsviðinu, en öðlast um leið eilíft líf í hugum lesenda
og þar með bókmenntanna.