Árbók Hins íslenzka fornleifafélags - 01.01.1964, Side 32

34
ÁRBÓK FORNLEIFAFÉLAGSINS
hafði barizt við Þorgest á Breiðabólstað og fengið ósigur er öldungis
óvíst. Vér skulum hins vegar gera ráð fyrir, að Eiríkur hafi strax
og hann hitti kunningja sína sagt þeim allt af létta af útivist sinni
og hvílíkt gósenland hann hafði fundið og dvalizt á, og hann hafi
enn fremur látið það spyrjast samtímis, að hann mundi flytjast
þangað næsta sumar. Með því móti hefur Eiríkur ár til þess að
undirbúa ferðina og jafnframt þeir, sem við fyrstu fregnir ráða
þegar við sig að fylgjast með honum.
Ekki er ólíklegt, að Eiríkur hafi verið drjúgur áróðurs- og aug-
lýsingamaður og í lokkandi heiti landsins hafi aðeins verið fólgið
brot af gyllilýsingum hans á Grænlandi. Eyjabóndinn Eiríkur rauði
þekkir það af reynslu, að Breiðfirðingar kunna vel að meta gagn
af hvers konar veiðiskap. Eggver og selalátur eru um allan fjörð.
Flyðra í eyjasundum og í Bjarneyjaál og gnægð annars fisks á
grunn- og djúpslóð. Eiríkur hefur vafalítið ekki síður haldið á loft,
hve veiðisælt væri í Grænlandi bæði í sjó og á landi, en hve gott
væri þar undir bú.3 Lýsing Eiríks á landinu fyrir handan sundið
hefur trúlega gengið í augu margra og fortölur hans um nýtt land-
nám hafa óefað látið vel í eyrum þeirra, sem bjuggu við rýran kost
á lélegu jarðnæði eða höfðu orðið hart úti í hallærinu mikla, sem
heimildir telja þá nýliðið hjá.1 2 Margt fleira gat stutt að því, að
menn fýsti að flytjast til Grænlands. Ævintýraþrá hefur jafnan
verið rík í brjósti mannsins, og ein leið hennar til þess að leita sér
svölunar er að kanna nýjar slóðir. Vera má, að einnig hafi verið líkt
farið um fleiri en Þorbjörn á Laugarbrekku, sem hafði ekki lengur
virðingarráð sökum lausafj árskorts og kaus því heldur að fara af
landinu en týna sæmdinni.3
Sennileg er getgáta Guðbrands Vigfússonar, að flestar sögur um
Grænland og Vínland muni upphaflega vera runnar frá Ara fróða.4
Vitneskjan um skipafjöldann í Grænlandsleiðangrinum gæti því
einnig verið komin frá honum, þótt hann sé ekki greindur í íslend-
ingabók. í Landnámabók er beinlínis tekið fram, að Ari sé heim-
ildarmaður að skipafjöldanum, og ætti því að mega treysta, að rétt
sé um hann hermt.5
1 Fornmanna sögur II, bls. 215.
2 Þorvaldur Thoroddsen: Árferði á Islandi í þúsund ár, Kaupmannahöfn 1916—
1917, bls. 16—17.
3 ísl. fornrit IV, bls. 205.
4 Safn til sögu Islands I, bls. 367.
5 Landnámabók, Kbh. 1925, bls. 62.