Andvari - 01.01.1948, Blaðsíða 45

ANDVARI
Sigurður Breiðfjörð
41
izt á að leggja út i það „ófæru vað“, eins og Sigurður orðaði
það, að fara vestur til lians. Hún var því áfram hjá Otta, og
svo fór, að þau eignuðust barn saman árið 1832, og voru þau
síðan samvistum, þar til Otti andaðist 27. des. 1841. Sigríður
hélt því i'ram fyrir rétti 1837, að liún hefði ekki tekið saman
við Otta fyrr en 1831, er hún frétti, að Sigurður hefði andazt
i Grænlandi. í manntali Ofanleitissóknar er hún til 1832 kölluð
Sigríður Nikulásdóttir Breiðfjörð og beykiskona, en síðan Sig-
ríður Nikulásdóltir bústýra.
I réltarhaldi því, sem áður greinir, var Sigríður að því
spurð, hver orsök hefði legið til þess, að þau Sigurður skildu.
Hún svaraði því til, að hún vissi ekki aðra ástæðu til þess en
hans „óstöðugheit“, og hefði skilnaðurinn orðið þvert á móti
vilja hennar. Sigríður andaðist 73 ára gömul, 16. maí 1859, hjá
dóttur sinni, Margréti Skúladóttur, Ijósmóður í Hólshúsi í
Vestmannaeyj um.
Sigurður dvaldist á ýmsum stöðum við Breiðafjörð þessi
árin. En árið 1829 var hann í Flatey hjá Guðmundi Scheving
agent. Þá hófust afskipti hans af svonefndum Skáleyjamálum,
sem urðu afdrifarík fyrir ævi hans, þó að lítill ljómi sé yfir
meðferð hans á þeim málum. En að vísu virðast menn liafa
haldið, að Sigurður sýndi þá mikla lögkænsku.
Árið 1827 andaðist Elín Brynjólfsdóttir, síðari kona Magn-
úsar Ketilssonar sýslumanns, og höfðu þau ekki átt börn
saman. Hún hafði arfleitt börn Magnúsar að mestum hluta
eigna sinna. Skiptu þau með sér eignum hennar og einnig
Skáleyjum, sem hún hafði gefið systur sinni, Arnfríði í Bæ
á Bauðasandi, og börnum hennar. Þegar þau fréttu um skiptin,
fengu þau Sigurð Breiðfjörð til þess að takast á hendur erfða-
kröfu þeirra. Fyrstu afskipti hans af málinu voru þau, að hann
skrifaði Páli Benediktssyni, tengdasyni Magnúsar, 25. marz
1829, og gerði kröfu til eyjanna. En 8. september 1829 afsalar
hann séra Eggerti Jónssyni Skáleyjar. Hefst afsalið á þessum
orðum: „Þar eð ég undirskrifaður, beykir Sigurður Breiðfjörð,
er nú orðinn þreyttur á kostnaði og ferðalagi að drífa Skál-
eyjasökina, en er að engu nær, og vantar peninga, hverja ég