Kirkjuritið - 01.04.1949, Qupperneq 22

Utan lands og innan.
Kristin kirkja á nú víða um lönd við
Ordass við mikla erfiðleika og raunir að stríða.
biskup. Grimmileg ofsókn er hafin sums staðar
gegn leiðtogum hennar.
Einna mest kveður að ofsóknunum í Ungverjalandi.
Hefir stjórnandi lútersku kirkjunnar þar, Ordass biskup
í Búdapest, nýlega fengið að kenna á þeim. Hann var
einhver allra glæsilegasti fulltrúi kristninnar á kirkju-
þinginu í Lundi 1947 og hreif fundarmenn mjög með
eldmóði, málsnilld og persónuþrótti. Það var auðfundið,
að kristindómurinn var honum helgast hjartans mál,
sem hann var albúinn að fórna öllu fyrir, jafnvel lífinu
sjálfu. Djörfung hans og einurð er frábær. Nú hefir
verkamannadómstóll ungverska ríkisins dæmt hann að
ósekju frá embætti í 5 ár og til 2 ára fangelsisvistar.
Hefir alþjóðakirkjuráð rannsakað mál hans og komizt að
þeirri niðurstöðu, að kærurnar gegn honum séu fyrirsláttur.
Vörn hans fyrir réttinum vakti mikla aðdáun. Hann
mælti þar að lokum á þessa leið: „Ég ætla að segja
dómendum mínum það, að síðan ég komst í þessa virðu-
legu stöðu eftir fátækt í æsku, hefi ég aldrei átt annan
eins frið í huga og 5 síðustu vikurnar. Ég hefi aldrei
vænzt þakklætis frá neinum fyrir starfið, sem ég hefi
unnið fyrir ættjörð mína. Það var aðeins skylda mín.
Ef dómstóllinn sýknar mig, þá mun mér ekki svíða mjög
sárið, sem ég hefi hlotið. En jafnvel þótt hann sakfelli
mig, þá tek ég þeim dómi með auðmýkt og trú, því að
ég veit, að einnig þá verður Guðs góði vilji.“