Hlín - 01.01.1954, Page 137

Hlín
135
Það er föstudagsmorgunn að áliðnum vetri. — Húsmóðirin
er vöknuð, hún sjer að mál er að rísa úr rekkju, því klukkan er
að verða sjö. — Hún lætur hugann reika til barnanna sinna,
sem í fjarlægð búa, biður Guð að annast þau og geyma, og
blessa sjer dagstörfin. — Hún klæðist og heldur til vinnustofu
sinnar, eldhússins, kveikir ljós á heimilisarninum, — olíukyntri
eldavjel, sem sendir ylinn út um húsið, eins og umhyggja og
ylur þarf að streyma frá henni sjálfri til heimilisfólksins. —
Hún notar tímann á meðan kaffið hitnar, og greiðir sjer, því
allstaðar skyldi snyrtimenskan í heiðri höfð, þó í afskektum dal
sje. — Hún tekur til kaffið fyrir piltana, fer síðan út í fjós og
mjólkar og gefur kálfunum, og ekki má gleyma seppunum, þeir
fá sinn skamt eins og aðrir. — Þegar inn er komið, þá er að
skilja mjólkina, þvo öll mjólkurílát og skilvindu.
Þegar þessu er lokið, er mál til komið að fara að hugsa fyrir
hádegismatnum. Hún setur upp kartöflur, en kalt kjöt á hún
síðan á miðvikudaginn og nú er gott að nota uppskriftina
hennar Rannveigar Líndal úr „Hlín“ og búa til kjötkökur. —
Meðan kartöflurnar sjóða notar hún tímann, býr um rúmin og
strýkur yfir gólfin, einnig burstar hún renninga og hreinsar
ganga. — En nú er kl. orðin ellefu, og því þörf á að herða á
matnum, því það er borðað kl. 12.
Að hádegisverði loknum þvær húsmóðirin upp leirinn og
önnur áhöld. En nú þarf að gera brauð og eitthvað með kaff-
inu upp á helgina, því ekki er gott að geyma það til morguns, þá
er laugardagur og öðrum hnöppum að hneppa. Og ekki getur
afdalakonan hlaupið í bakaríið, þó gest kynni að bera að garði.
— Jæja, þá er nú brauðgerðinni lokið, en nú er kominn kaffi-
tími, og piltarnir komnir inn, hún afgreiðir miðdegiskaffið, og
gengur frá í eldhúsi, og kl. er að verða fjögur. — Hún hefur nú
tíma til að setjast í baðstofu og taka til við handavinnuna í
tvær stundir. Hún er að grípa í að sauma vinnuföt á bónda sinn.
— En kl. sex er mál að setja upp kvöldgrautinn, hann verður
að eldast áður en farið er í fjós, annars getur illa farið. — Hún
undirbýr nú kvöldverðinn að öðru leyti, en kl. hálf sjö fer hún
út að mjólka, gefa kálfum og skilja mjólkina, er inn er komið og
þvo mjólkurfötur, síðan er borðaður kvöldmaturinn. — Og nú
vill húsmóðirin hafa hraðan á, því kl. er orðin hálf átta. — Hún
gengur nú frá í eldhúsinu og tekur til kvöldmjólkina fyrir
fólkið, og nú getur hún gengið til baðstofu og sest við tækið, og
eru það oft hennar bestu stundir dagsins. — Hún tínir nú þá
fróðleiksmola, sem kunna að falla af borðum hinna vísu manna