Uppeldi og menntun - 01.01.2010, Qupperneq 5

Uppeldi og menntUn/icelandic JoUrnal of edUcation 19(1–2)/2010 5
frá ritstjóra
Í tímaritinu Uppeldi og menntun eru birtar ritrýndar fræðilegar eða rannsóknatengdar
greinar á sviði uppeldis- og menntamála. Einnig eru birtar kynningar og umfjöllun
um nýjar bækur á fræðasviðinu, svo og viðhorf fræðimanna og reyndra skólamanna
til ýmissa þátta uppeldis- og menntamála.
Greinar úr eldri heftum Uppeldis og menntunar (1992–2009) munu birtast á vef tíma-
ritsins innan skamms. Frá og með þessu hefti er áætlað að greinar birtist á vefnum
einu ári eftir útkomu prentaðs heftis.
Að þessu sinni eru gefin út í einu lagi vor- og hausthefti Uppeldis og menntunar. Í
heftinu eru birtar átta fræðilegar greinar. Grein Jóhönnu Einarsdóttur fjallar um leik-
skólastarf af sjónarhóli foreldra. Í grein sinni gerir Freyja Birgisdóttir grein fyrir því
hvernig kennsla um orðhluta eykur orðskilning nemenda á yngsta stigi grunnskólans.
Börkur Hansen, Ólafur H. Jóhannsson og Steinunn Helga Lárusdóttir fjalla í grein
sinni um faglegt sjálfstæði grunnskóla út frá viðhorfum skólastjóra. María Steingríms-
dóttir segir í sinni grein frá reynslu kennara eftir fimm ár í starfi. Grein Hjalta Jóns
Sveinssonar og Barkar Hansen fjallar um trú á eigin færni og hvata til náms og leitast
við að svara þeirri spurningu hvers vegna nemendur hætta á Almennri námsbraut í
Verkmenntaskólanum á Akureyri á meðan aðrir halda áfram. Guðmundur Ingi Guð-
mundsson og Guðbjörg Linda Rafnsdóttir skýra í sinni grein frá innri og ytri áhrifa-
þáttum í starfsánægju framhaldsskólakennara. Í grein Rannveigar Traustadóttur,
Hönnu Bjargar Sigurjónsdóttur og Helga Þórs Gunnarssonar er því lýst hvernig er að
alast upp með fötlun út frá frásögnum hreyfihamlaðra ungmenna af æsku sinni og
uppvexti. Loks skýra Ingi Rúnar Eðvarðsson og Guðmundur Kristján Óskarsson í
grein sinni frá því hvað ráði vali á námssviði og háskóla, en greinin er byggð á við-
horfum brautskráðra nemenda frá Háskólanum á Akureyri.
Í viðhorfahluta tímaritsins er að þessu sinni fjallað um innleiðingu Bolognaferlisins
á Íslandi og reynslu íslenskra háskóla af innleiðingunni frá sjónarhorni nokkurra full-
trúa háskólanna. Ritstjórar viðhorfahlutans og höfundar inngangskafla um Bologna-
ferlið og íslenska háskóla eru Guðrún Geirsdóttir og Ingólfur Ásgeir Jóhannesson. Í
viðhorfahlutanum fjallar Þórður Kristinsson um sögu og tilgang Bolognaferlisins. Björg
Jóna Birgisdóttir gerir grein fyrir áhrifum Bolognaferlisins á nám, kennslu og stjórnun
í Listaháskóla Íslands. Björn Þorsteinsson fjallar um Bolognaferlið og Landbúnaðar-
háskóla Íslands. Ingibjörg Guðmundsdóttir og Signý Óskarsdóttir lýsa Bologna sem
ferli framfara og tækifæra við Háskólann á Bifröst. Bjarni K. Kristjánsson og Skúli Skúla-
son fjalla um innleiðingu Bolognaferlisins við Háskólann á Hólum. Sigrún Magnús-
dóttir og Sigurður Kristinsson gera grein fyrir Bolognaferlinu og Háskólanum á
Akureyri. Steinn Jóhannsson fjallar um Bolognaferlið í Háskólanum í Reykjavík. Loks
gerir Þórður Kristinsson grein fyrir Bolognaferlinu í Háskóla Íslands.
Ritnefnd þakkar þeim fjölmörgu sem komu að
útgáfu þessa heftis fyrir ánægjulegt samstarf.