Gerðir kirkjuþings - 01.01.2013, Blaðsíða 122

122 123
Á vegum fræðslusviðs er reglulega boðið til funda þar sem lagt er mat á fræðslustarfið á
viðkomandi svæði.
Á fjögurra ára fresti skal boða til fræðsluþings kirkjunnar, þar sem lagt skal mat á
fræðslustefnu Þjóðkirkjunnar innihald og framkvæmd, hvern þátt þess, svo og á það starf
sem unnið er í einstaka starfseiningum kirkjunnar er sinna fræðslustarfi.
V. Kafli: Gildistaka
Endurskoðuð fræðslustefna þjóðkirkjunnar taki gildi 1. janúar 2014.
Greinargerð.
Samkvæmt ákvörðun Biskups Íslands var boðað til fræðsluþings dagana 23. og 24. maí
2013. Samkvæmt gildandi fræðslustefnu sem tók gildi 1. júlí 2005 átti að endurskoða
stefnuna á fjögurra ára fresti. Það hefur ekki verið gert fyrr en nú. Ekki er kveðið á um það í
fræðslustefnunni hvernig eigi að manna eða skipa fulltrúa á fræðsluþing. Nauðsynlegt er að
kveða á um slíkt í endurskoðaðri stefnu. Það varð því verkefni fræðsludeildar biskupsstofu
að setja fram tillögu að vinnulagi. Óskað var eftir tilnefningum af hálfu prófastsdæmanna,
einn fulltrúa af hálfu landsbyggðarprófastsdæmanna sex og tvo fulltrúa af hálfu þriggja
fjölmennustu prófastsdæmanna á höfuðborgarsvæðinu og þar í kring. Samtals 12 fulltrúa.
Lagt var til að skipta þinginu á tvo daga annars vegar að boða til opinnar umræðu þar
sem öllu þjóðkirkjufólki var frjálst að koma og tjá sig ásamt hinum tilnefndu fulltrúum
og starfsfólki fræðsludeildar biskupsstofu en síðan seinni daginn komu einungis hinir
tilnefndu fulltrúar saman og leituðust við að vinna úr gögnum og hugmyndum og skerpa
sýn á það sem þyrfti að breyta.
Drög að endurskoðun var síðan send fulltrúum til yfirferðar og viðbragða. Í ljósi skýrslu
úrbótanefndar kirkjuþings frá 2012, leggur biskup það til að áhersla verði lögð á fræðslu
fyrir leiðtoga um eðli og afleiðingar kynferðisbrota og þjálfun um æskileg viðbrögð þegar
greint er frá kynferðisbroti. Áhersla verði lögð á þetta atriði næstu fjögur árin.
Biskup og starfsfólk Þjónustusviðs unnu endanleg drög að endurskoðaðri fræðslustefnu
sem nú liggur fyrir kirkjuþingi.