Tímarit Máls og menningar - 01.09.2017, Side 2

2 TMM 2017 · 3
Frá ritstjóra
Rithöfundar og skáld sem færa okkur drauma og sagnir sinna samfélaga eru
sérstakir aufúsugestir hér á landi á Bókmenntahátíð sem haldin er reglulega
í Reykjavík og er eitthvert þarfasta framtak sem hugsast getur á sviði bók-
mennta.
Fátt er betur til þess fallið að auka víðsýni og víkka sjóndeildarhring en
kynni af bókmenntum annarra þjóða og ekkert er mannkyni nauðsynlegra
nú á tímum en gagnkvæmur skilningur og gagnkvæm virðing fyrir siðum,
venjum og menningu annarra.
Heftið er að þessu sinni helgað Bókmenntahátíð í Reykjavík 2017. Við
höfum fengið til liðs við okkur fólk sem er frótt um viðkomandi höfunda,
hvort heldur sem þýðendur, lesendur eða bókmenntafræðingar sem sér-
fróðir eru á sviði þeirra bókmennta sem höfundarnir skrifa. Einnig eru þýdd
nokkur sýnishorn af skrifum þeirra gesta sem hátíðina sækja að þessu sinni.
Af öðru efni heftisins má nefna sérstaklega forvitnilegan samanburð
Þorgeirs Tryggvasonar á þýðingum Matthíasar Johcumssonar, Helga Hálf-
danarsonar og Hallgríms Helgasonar á Óþelló Shakespeares og grein Öldu
Bjarkar Valdimarsdóttur um Jane Austen. Að auki eru í heftinu ljóð, sögur,
umsagnir um bækur, viðtalið vinsæla sem Kristín Ómarsdóttir tekur fyrir
hvert hefti - og er nú við Kristínu Steinsdóttur – og auðvitað hin ómissandi
Hugvekja Einars Más Jónssonar.
Guðmundur Andri Thorsson