Milli mála - 2018, Síða 114

NÆRVERA OG TÚLKUN ÞÝÐANDANS
114 Milli mála 10/2018
Þýðandinn Poestion birtist sem stýrandi valdhafi sem stjórnaði
aðgangi að textunum eða – svo notast sé við mynd Genettes af
anddyrinu – tók á móti lesendum við innganginn og vísaði þeim
inn með ótvíræðum hætti. En Poestion tók sér ekki einungis stöðu
kennara og upplýsts fræðimanns gagnvart viðtakendum og lesendum
sínum, heldur tók hann sér fyrirfram mótaða, ráðandi stöðu gagnvart
íslenskri menningu. Hann notaðist við andstæðuparið við og hinir.
Sjónarhorn hans á Ísland einkenndist af einlægum áhuga, velvilja
og miklum mætum á nákvæmri þekkingu. Afstaða hans var hins
vegar oft yfirlætisleg og tók mið af viðhorfum frá (Mið-)Evrópu sem
gerðu mikið úr framandleika viðfangsefnisins. Sambandið á milli
hlutaðeigandi menningarheima mótaðist auðsjáanlega af ójöfnuði,
menningu þýðandans í hag.
Á ferli sínum sem Íslandssérfræðingur sendi Poestion frá sér
fjölda rita af ýmsu tagi sem hann tengdi sífellt hvert við annað
gegnum tilvísanir. Afleiðingin varð sú að auk þeirra nærtexta sem til
staðar voru í hverri bók fyrir sig varð til umfangsmikið og áhugavert
safn fjærtexta, sem í heild sinni mynduðu umtalsvert verk Poestions
um Ísland. Þýðandinn Poestion og höfundurinn Poestion unnu
markvisst og nær óaðgreinanlega að þessu verki.
María Helga Guðmundsdóttir þýddi úr þýsku