Árbók Hins íslenzka fornleifafélags - 01.01.1973, Blaðsíða 158

158
ÁRBÓK FORNLEIFAFÉLAGSINS
Ágústsson, gera við þak og bakhlið hússins, en skífuna, sem á því
var, reyndist nauðsynlegt að fjarlægja og var sett járn í staðinn.
Er stefnt að því að koma húsi þessu í gott lag á næstu árum, en það
er meðal þeirra húsa, sem brýn nauðsyn er að varðveita, enda hef-
ur það sett svip sinn á Hafnarfjarðarkaupstað meira en öld. Er
fullur vilji fyrir því að varðveita umhverfi Sívertsenshúss sem mest
óbreytt í framtíðinni.
f þessu sambandi má geta þess, að þau hjón Karsten Ronnow og
Gunilla Moodysson, könnuðu Bernhöftshúsin gömlu í Reykjavík
og landlæknishúsið og skiluðu skýrslu um þá athugun. Þeim fannst
báðum, að hús þessi væru það mikilsverð fyrir byggðarsögu Reykja-
víkur og í góðu standi miðað við aldur sinn og umhirðu, að ekki
væri minnsta ástæða til að rífa þau eða fjarlægja heldur bæri að
leggja kapp á að gera við þau og glæða nýju lífi í miðborginni.
Að auki skoðuðu þau í ferð sinni norður gömlu byggingarnar í
Skagafirði, sem fyrr er nefnt, Hólakirkju, Hofsóshús, Grafarkirkju,
Glaumbæ og Víðimýrarkirkju.
Á Keldum var enn unnið að ýmsum lagfæringum, og var meðal
annars sett hellugólf í skálann, sem hafði þó ekki verið. Var mold-
argólf áður í skálanum en hellugólfið sett til þrifnaðarauka.
ByggSasöfn.
Til byggðasafna voru á árinu veittar á fjárlögum kr. 1.340 þús.,
og skiptist þannig: Til gæzlulauna kr. 408.633 en byggingarstyrkur
kr. 931.367. Að vísu urðu gæzlulaun nokkru meiri en áætlað var,
og greiddi safnið því af fé sínu það, sem fram yfir fór.
Byggingarstyrkir og aðrir styrkir til safnanna urðu sem hér segir:
Byggðasafn Borgarfjarðar kr. 100 þús., til viðgerðar Auðkúlukirkju
í Svínadal kr. 75 þús., Samband húnvetnskra kvenna, til heimilis-
iðnaðarsafns, kr. 25 þús., til safns Egils Ólafssonar á Hnjóti, kr. 40
þús., Byggðasafn Þingeyinga kr. 100 þús., Gamlabúð á Eskifirði,
v. flutnings og viðgerðar, kr. 150 þús., Byggðasafn Rangæinga og
Vestur-Skaftfellinga, Skógum, kr. 16.367, sjóminjasafn Eyrar-
bakka, kr. 75 þús., Búrfellskirkja í Grímsnesi, viðgerðarstyrkur,
kr. 50 þús., Kirkjuvogskirkja í Höfnum, viðgerðarstyrkur, kr. 150
þús., hús Bjarna riddara í Hafnarfirði, viðgerðarstyrkur, kr. 150 þús.
Byggðasöfnin störfuðu með sama hætti og undanfarin ár, og urðu
engar meiriháttar breytingar á högum þeirra. Tölur um aðsókn liggja
ekki fyrir, en aðsókn mun alls staðar hafa verið góð og fer enda
vaxandi með auknum ferðamannastraumi.