Morgunblaðið - 10.05.2001, Blaðsíða 6

FRÉTTIR
6 FIMMTUDAGUR 10. MAÍ 2001 MORGUNBLAÐIÐ
TÆPLEGA sjötug kona, sem efn-
hagsbrotadeild ríkislögreglustjóra
hefur ákært fyrir að beita skipu-
lögðum blekkingum til að fá sjö
karlmenn til að afhenda sér tæp-
lega 30 milljónir og nýta sér bág-
indi hins áttunda til að afla sér 23,6
milljóna króna, hefur breytt fram-
burði sínum en við þingfestingu
málsins játaði hún öll ákæruatrið-
in. Síðar sendi hún Héraðsdómi
Reykjavíkur bréf þar sem hún bar
játninguna til baka. Í ákæru rík-
islögreglustjóra eru gerðar bóta-
kröfur fyrir hönd mannanna. Fjór-
ir þeirra hafa nú farið fram á að
kröfurnar verði dregnar til baka en
samtals námu bótakröfur þeirra
tæplega 52 milljónum króna. Allir
mennirnir átta munu bera vitni við
aðalmeðferð málsins sem verður í
byrjun júní.
Sonur konunnar er einnig
ákærður en hann er sakaður um að
hafa tekið við tæplega níu millj-
ónum af ávinningi móður sinnar.
Auk þess sem honum hafi, í sam-
starfi við móður sína, tekist að fá
mann til að lána sér 1,5 milljónir og
veðsetja íbúð sína fyrir skulda-
bréfi, afla sér um 2,7 milljóna
króna sem ekki voru greiddar til
baka.
Misskildi spurningar
við þingfestingu
Við fyrirtöku málsins í gær sagð-
ist konan ekki á nokkurn hátt hafa
nýtt sér bágindi þessara manna til
að fá þá til að afhenda sér fé. Þeir
hefðu viljað hjálpa henni og það
kæmi engum öðrum við. Hún hefði
misskilið spurningar sem beint var
til hennar við þingfestinguna. Hún
hefði talið að verið væri að spyrja
um þær upphæðir sem hún hefði
tekið við og þeim hefði hún jánkað.
Við fyrirtökuna í gær var jafn-
framt lögð fram leiðrétting á
kennitölu konunnar en samkvæmt
henni er hún 67 ára gömul.
Hæstu upphæðina fékk konan
frá tæplega áttræðum manni í
Reykjavík en hún er ákærð fyrir að
hafa nýtt sér félagsleg og andleg
bágindi hans til að afla sér samtals
um 23,6 milljóna króna sem, sam-
kvæmt ákæru, var endurgjald fyrir
að þrífa heimili mannsins frá sept-
ember 1996. Þá er hún ákærð fyrir
að hafa fengið hann til að gangast
við því að íbúð hans yrði veðsett til
tryggingar fyrir lífeyrissjóðsláni
dóttur sinnar. Þá hafi konan ásamt
syni sínum fengið manninn til að
láta syninum í té um 2,7 milljónir
króna. Þá er syni hennar gefið að
sök að hafa tekið við um níu millj-
ónum af ávinningi móður sinnar.
Peningarnir voru notaðir til
greiðslu á persónulegum útgjöld-
um hans, m.a. til bílakaupa og
greiðslu á greiðslukortareikningi.
Hafði samband
við fleiri menn
Mennirnir sjö sem hún fékk til
að lána sér féð eru allir búsettir á
landsbyggðinni. Samkvæmt heim-
ildum Morgunblaðsins mun konan
hafa haft samband við þá að fyrra
bragði og bauðst jafnan til að ráð-
ast í vist til þeirra. Ekki kom þó til
þess að hún réðist í vist en eftir
það fékk hún mennina sjö til að
lána samtals tæplega 30 milljónir.
Hún hefur endurgreitt einum
manninum 990 þúsund. Konan mun
hafa haft samband við talsverðan
fjölda karlmanna til viðbótar en
þeir munu ekki hafa lánað henni fé.
Í ákæru ríkislögreglustjóra kem-
ur fram að hin meintu brot áttu sér
stað á árunum 1992 til ársins 2000.
Hún er ákærð fyrir að hafa með
skipulögðum blekkingum fengið þá
til að lána sér féð þrátt fyrir að
vera það ljóst að hún hefði enga
möguleika á að endurgreiða lánin.
Þá hafi hún notfært sér rangar
hugmyndir mannanna um greiðslu-
getu hennar og eignir til að fá þá til
að afhenda sér féð en mennirnir
hafi ekki vitað af lánveitingum
hver annars til hennar.
Tæplega sjötug kona ákærð fyrir að svíkja um 55 milljónir út úr átta karlmönnum
Segir mennina hafa
viljað hjálpa henni
SLÖKKVILIÐSMENN hafa aflýst
aðgerðum til að takmarka yfirvinnu
og var eðlileg vakt á slökkvistöðinni í
Reykjavík í gær en vantað hafði á
vaktina tvo dagana þar á undan.
Undirbúningur vegna verkfallsboð-
unar er hins vegar áfram í gangi og
er gert ráð fyrir að niðurstaða at-
kvæðagreiðslu þar að lútandi liggi
fyrir á laugardaginn kemur og er þá
miðað við að verkfall hefjist síðustu
viku maímánaðar.
Guðmundur Vignir Óskarsson,
formaður Landssambands slökkvi-
liðs- og sjúkraflutningamanna, sagði
að þetta hefði orðið niðurstaðan af
fundi forsvarsmanna Landssam-
bandsins og viðsemjenda í fyrra-
kvöld þar sem komið hefði fram ótví-
ræður vilji til að taka upp
samningaviðræður á nýjan leik. Að
teknu tilliti til þess hefði orðið nið-
urstaðan að fresta þessum aðgerð-
um, sem samþykktar hefðu verið í
deildum sambandsins í Reykjavík, á
Suðurnesjum, Akureyri og Keflavík-
urflugvelli. Ætti hann von á því að
samningafundur yrði boðaður á nýj-
an leik á hverri stundu en upp úr við-
ræðum slitnaði um miðja síðustu
viku.
Atkvæði greidd um
verkfallsboðun
Guðmundur Vignir sagði að hins
vegar yrði haldið áfram undirbún-
ingi verkfallsboðunar. Gert væri ráð
fyrir að búið yrði að greiða atkvæði á
föstudagskvöld og að talið yrði á
laugardag. Boða þyrfti verkfallið
með hálfs mánaðar fyrirvara og væri
því við það miðað að það kæmi til
framkvæmda í síðustu viku maímán-
aðar og hæfist miðvikudaginn 30.
maí. Verkfallið er ótímabundið, en
slökkviliðsmönnum er skylt lögum
samkvæmt að halda uppi tiltekinni
lágmarksþjónustu í verkfalli.
Slökkviliðsmenn
aflýsa aðgerðum
UNNIÐ hefur verið að lag-
færingum og breytingum
undanfarin ár á vatnsveit-
unni í gamla þorpinu í Flatey
á Breiðafirði. Í vor voru
meðal annars settir niður
fjórir 6 þúsund lítra tankar
þar sem vatni er safnað úr
brunnum og jarðvatns-
lögnum í nágrenninu. Jafn-
framt hefur verið byggt
dæluhús og lagnir endurnýj-
aðar heim að húsunum.
Tveir skips-
farmar af möl
Í tengslum við þessar
framkvæmdir var samið við
Björgun hf um að koma með
tvo skipsfarma af möl til
Flateyjar, sem dælt var þar á
land. Efnið verður notað í
framkvæmdir á vegum
vatnsveitunnar og í verkefni
á vegum Orkubús Vestfjarða,
auk þess sem undirstöður
voru gerðar fyrir nýja ol-
íutanka. Einnig er ráðgert
að bera ofan í götu og stíga.
Olíudreifing setti nýlega
upp nýja tanka fyrir olíu við
bryggjuna og um leið var
gamall 50 þúsund lítra tank-
ur fjarlægður af Tröllenda
ofar á eynni.
Morgunblaðið/HS
Þorsteinn Bergsson, húseigandi í Flatey, við vinnu í tankagryfjunni. Í baksýn má sjá húsin Strýtu og Bjarg.
Vatns-
veita
í Flatey
FORSETI Íslands, Ólafur Ragnar
Grímsson, var í gær gerður að heið-
ursdoktor í lögum við háskólann í
Manchester á Englandi á hátíð-
arsamkomu í tilefni 150 ára afmælis
skólans. Ólafur Ragnar stundaði
BA-nám í hagfræði og stjórn-
málafræði í Manchester árin 1962 til
1965 og lauk doktorsnámi í stjórn-
málafræði við sama skóla á árunum
1967–1970.
„Það snart mig mjög djúpt að há-
skólinn skyldi ákveða að heiðra mig
með þessum hætti. Þetta er heiður
sem ég met mikils. Langur tími er
liðinn síðan ég lauk hérna námi og
margt hefur á dagana drifið síðan.
Sú ákvörðun skólans að veita mér
þessa nafnbót á 150 ára afmælinu
var í senn óvænt en einnig dýrmæt
fyrir mig,“ sagði Ólafur Ragnar í
samtali við Morgunblaðið frá Man-
chester.
Hann sagði að fram hefði komið
við athöfnina að nafnbótin væri
einnig viðurkenning til Íslands
vegna þess rannsóknarstarfs í
félagsvísindum sem hefði verið unn-
ið þar og til þeirrar lýðræðislegu
hefðar sem hefði verið traustur
þáttur í íslensku samfélagi. Margir
Íslendingar hafa stundað há-
skólanám í Manchester á síðustu
áratugum og sagðist Ólafur Ragnar
hafa hitt þrjá íslenska námsmenn að
máli í heimsókn sinni nú.
„Ég átti áhrifarík ár hér sem
mótuðu mig mikið og ég á margar
góðar minningar frá borginni. Það
hefur verið merkilegt að koma hing-
að á ný. Ég hef ekki komið til Man-
chester frá því að ég lauk dokt-
orsnáminu. Skólinn hefur stækkað
mikið og er einn af stærstu háskól-
um Bretlands í dag. Hér hefur mikil
uppbygging átt sér stað sem fróð-
legt hefur verið að kynnast. Skólinn
er að búa sig kröftuglega undir 21.
öldina og mikill metnaður lagður í
það af hálfu skólastjórnenda, borg-
aryfirvalda í Manchester og stjórn-
valda í Bretlandi. Sú forsenda er
lögð til grundvallar að þekkingin sé
traustasti grunnur framfara og vel-
sældar á nýrri öld. Það er fróðlegt
að sjá hvernig menn taka á því verki
við þennan gamla skóla,“ sagði Ólaf-
ur Ragnar ennfremur.
Einnig voru sæmd heiðursdokt-
orsnafnbót í gær þau Valerie Ann
Amos, barónessa og ráðherra þró-
unarmála, Tom Courtenay leikari,
Sir Peter Hall prófessor, Sir Robert
May prófessor og Dame Bridget
Ogilvie.
Í ávarpi til Ólafs Ragnars, sem
prófessor Bruce Wood flutti við at-
höfnina í gær, rakti hann námsferil
forsetans við skólann og framlag
hans til þróunar félagsvísinda við
Háskóla Íslands. Prófessor Wood
rakti einnig margvísleg störf Ólafs
Ragnars á vettvangi fræða og þjóð-
mála, innanlands og utan, og vék að
hinni sterku lýðræðishefð Íslend-
inga. Þá lýsti hann einnig nokkrum
ummælum frá fyrrum kennurum og
samstarfsmönnum forsetans við há-
skólann í Manchester sem þeir létu
falla í tilefni af heiðursdokt-
orsnafnbót hans, að því er fram
kemur í tilkynningu frá embætti
forsetans.
Situr ráðstefnu í London í dag
Ólafur Ragnar flytur setn-
ingarávarp og tekur þátt í um-
ræðum á ráðstefnu um upplýsinga-
iðnað sem Útflutningsráð og
Nýsköpunarsjóður halda í London í
dag. Meðal þeirra sem taka þátt í
ráðstefnunni eru íslensk fyrirtæki á
sviði hugbúnaðar, íslenskar fjár-
málastofnanir og breskir fjárfestar.
Forseti Íslands gerður að heiðursdoktor við háskólann í Manchester
„Heiður sem
ég met mikils“
Ólafur Ragnar Grímsson, forseti Íslands, í búningi heiðursdoktors.