Eimreiðin - 01.05.1970, Side 67

Vatnaskógar vors og friðar
vaka í blárri fjallasýn.
Hljóma eins og hörpustrengir
hjartans þrá og gleði mín.
Ómar koma, ómar líða,
eins og klukkur hringi rótt,
hrifnar þínum helgidómi
hlýja, bjarta sumarnótt.
Góða jörð í grænum klæðum,
gefðu tákn í þjóðardraum!
Fífilstjörnur frónskra byggða
fölni ei við tímans straum.
Láttu hóp hvers varpa verða
vitaraðir auðnarsands.
Yfir sögu um aldir svífi
ilmur blóma vors míns lands.
ísafoldin, undrastorðin,
ættarland og heilög jörð!
Voröld þín og vættir traustar
vernda sérhvern dal og fjörð.
Svellur enn við sumaryndi
sonarást í brjósti manns.
Er nokkuð stærra nú sem heitir
náðarsending guðs til hans?