Orð og tunga - 01.06.1988, Qupperneq 9

Frá stjórn Orðabókar Háskólans
Við Orðabók Háskólans er unnið að fjölmörgum verkefnum sem beint og ó-
beint tengjast því hlutverki Orðabókarinnar að gefa út sögulega orðabók er nái
yfir tímabilið frá 1540 til okkar daga. Fræðistörf á sviði orðfræði eru reyndar
undirstaða og nauðsynlegur undanfari þess að Orðabókinni megi takast að gegna
hlutverki sínu sem orðfræðistofnun. Allt frá árinu 1982 hefur verið um það rætt
í stjórn Orðabókar Háskólans að nauðsynlegt sé að skapa fræðimönnum Orða-
bókarinnar vettvang til að kynna rannsóknir sínar og birta niðurstöður þeirra.
Fram til þessa hefur þó vantað rit er gegni slíku hlutverki. Riti því sem nú birtist
fyrsta sinni og valið hefur verið heitið Orð og tunga er ætlað að bæta úr þessu.
Ritinu er ætlað það hlutverk að vera vettvangur fræðimanna Orðabókar Háskól-
ans til að gera grein fyrir rannsóknum sínum. Enn fremur er gert ráð fyrir að
aðrir starfsmenn Orðabókarinnar og sérfræðingar sem vinna að verkefnum sem
tengjast starfsemi Orðabókarinnar geti birt efni í ritinu. Fyrst um sinn er ekki
gert ráð fyrir að Orð og tunga verði ársrit heldur er ætlunin að það birtist eftir
því sem efni safnast og þörf krefur.
Segja má að Orðabók Háskólans standi á nokkrum tímamótum um þessar
mundir. Annars vegar hefur fjörutíu ára starf skilað miklu efni og því tímabært
að fara að huga að úrvinnslu þess og útgáfu, samhliða því sem orðtöku er haldið
áfram. Hins vegar opnar tölvutæknin leiðir til miklu stórvirkari orðtöku en hægt
hefur verið að stunda til þessa og auðveldar jafnframt hvers kyns úrvinnslu og
útgáfu. Orðabók Háskólans hefur því skapað sér góð skilyrði til að ráðast í
skipulega útgáfu þess efnis sem safnað hefur verið.
I ljósi þessa er þess að vænta að útgáfa hvers kyns orðfræðirita skipi veiga-
mikinn sess í starfsemi Orðabókarinnar á komandi árum. Á næsta ári mun
Orðabókin gefa út Orðsifjabók eftir Ásgeir Blöndal Magnússon og ákveðið hefur
verið að ráðast í útgáfu sögulegrar Sagnorðabókar. Enn fremur hefur verið á-
kveðið að gefa út á vegum Orðabókarinnar ritaröð undir heitinu Orðfræðirit fyrri
alda auk ýmissa annarra orðabókarverka. Utgáfa orðfræðiritsins Orð og tunga er
því aðeins einn þáttur í skipulegri útgáfustarfsemi á vegum stofnunarinnar.
Jón G. Friðjónsson
formaður
vn