Skagfirðingabók - 01.01.2016, Blaðsíða 26
SKAGFIRÐINGABÓK
26
Þetta var mikið ferðalag í þá daga.
Enginn spotti malbikaður, vegirnir
holóttir, krækt fyrir hvern fjörð og ekið
um torleiði á borð við Þingmannaheiði.
Aftur í bílnum sátum við systkinin
þrjú, stundum bílveik, og oftast var
með okkur í för barnapía sem passaði
Guðrúnu. Þetta var yfirleitt tveggja
daga ferð, gist í Bjarkalundi og stundum
þurfti að aka alla leið suður í Borgarfjörð
ef Laxárdalsheiðin var ófær fólksbílum,
sem hún var oft í vorleysingunum. Fyrir
unglingsstúlkur frá Bolungarvík var það
mikil forfrömun að ráða sig í vist til
mömmu og pabba sumarlangt. Því fylgdi
ferðalag norður og dvöl á ókunnum
stað. Þær hafa oft haft á orði hvílíkur
ævintýratími þetta var. Ferðalög fátíð í
þá daga og sumardvöl á Sauðárkróki því
mikil og eftirminnileg tilbreyting.
Og þarna mættum við sem sagt, fimm
manna fjölskylda og rúmlega það á vori
hverju, settumst upp hjá afa og ömmu
eins og ekkert væri sjálfsagðara. Auðvitað
var þetta mikið umstang fyrir þau, það
sér maður núna, en fannst ekkert sjálf-
sagðara þá. Og svo voru þarna líka frænk-
ur mínar Guðrún Ingibjörg og Helga
Bjarnadætur. Það hefur augljóslega verið
þröng á þingi á þessum tíma.
Aldrei minnist ég nokkurs annars en
að þetta væri allt talið sjálfsagt og eðlilegt
og rekur ekki minni til neinna árekstra.
Búðin varð hálfgerður leikvöllur fyrir
okkur. Þegar ég hugsa til baka man ég
svo sem að amma hafi stundum þurft að
hasta á okkur. Ég man ekki eftir að afi
gerði það; sagði okkur þó stundum að
finna okkur eitthvað til að gera utan dyra,
af sinni miklu hægð og með lágum rómi.
Þegar María lauk fullnaðarprófi fór hún í skólaferðalag suður á land. Myndin er tekin á
Þingvöllum 14. júní 1945. Fremsta röð f.v.: Sigurberg Sigurðsson, Haukur Þorsteinsson, Marta
Sigtryggsdóttir, Ingigerður Pétursdóttir, Lilja Jónsdóttir, Anna Jóna Guðmundsdóttir (sér á
vanga hennar), Guðrún Jóhannesdóttir, Hallfríður Guðmundsdóttir, María Haraldsdóttir,
Ásdís Svavarsdóttir, Sólborg Valdimarsdóttir. Miðröð f.v.: Magnús Bjarnason kennari, Björn
Blöndal, Hannes Pétursson. Aftast eru Alexander Róbert Jónsson (t.v.) og Sigtryggur Pálsson.
Eigandi myndar: Hallfríður Guðmundsdóttir.