Gripla - 2019, Side 131

131
upphafsstaf fyrir Nigra sum á 69v. Ekki verður fullyrt að upphafsstafirnir á
69r og 69v séu eftir sama skrifara, en S á 72r er af allt öðrum toga, teiknað
með breiðari dráttum. Innra tvinnið er lýst með rauðu bleki sem mjög hefur
dofnað. Hér eru stórir rauðir upphafsstafir, þó án annars skrauts (A á 70r
og 71r), og einnig eru við báða söngvana ritaðar fyrirsagnir með rauðu bleki
sem harla örðugt er að lesa úr.60 Greina má þrjár ólíkar nótnagerðir en ekki
er víst að skrifarar hafi verið svo margir; vera má að sami skrifari hafi haft
ólíkar gerðir þeirra á valdi sínu.61
Alls stóðu níu lög á nótnablöðunum í AM 461 12mo en nótur við tvö
þeirra eru ólæsilegar eins og áður er getið. Öll lögin eru við latneska bæna-
texta og öll eru þau Maríusöngvar utan tvö. Sanctifica nos Domine heyrir
til krossmessu á vori (Inventio crucis, 3. maí); Michael prepositus paradisi
tilheyrir Mikjálsmessu (29. september) en er einnig varðveittur í broti
úr fyrirbænum (suffragia communa) sem taldar eru ættaðar úr Skálholti
(aM 241 b I ɛ fol.). Sancta Maria, succurre miseris var oftast sungið á
himnaför Maríu (Assumptio Mariae, 15. ágúst) en gat einnig átt við aðrar
Maríuhátíðir, til dæmis fæðingardag hennar eða boðunardag. O florens rosa
er andstef fyrir Maríuhátíðir og sama gildir um Gaude, Dei genitrix og Ave
beatissima civitas. Nigra sum . . . sicut tabernacula, við texta úr Ljóðaljóðum
Biblíunnar, er ólíkt sjaldgæfari en annar söngur með sama upphaf og óvíst
er hvort hann tilheyrði tilteknum degi. Textarnir eru kunnir úr öðrum
evrópskum heimildum, að undanskildu andstefi sem hefst Ave Maria;
það hefur aðeins fundist í fyrrnefndu handriti með bænasöng úr Skálholti.
Ekki er vitað um nótur við bænina Ave sanctissima virgo í öðrum heim-
ildum. Lögin við Sancta Maria, succurre miseris, Gaude, Dei genitrix og Ave
beatissima civitas eru hér önnur en þau sem varðveitt eru í erlendum bókum
60 Upphafsstafirnir á 69/72 virðast líkir þeim sem ritaðir eru fyrr í handritinu, til dæmis á 1r;
rauðu upphafsstafirnir á 70r og 71r eiga sér einnig hliðstæðu fyrr, í bænahlutanum sem hefst
á 47r. Því er ekki ósennilegt að nótnakverið eigi uppruna sinn á sama stað og megnið af
handritinu. Hugsanlega eru rauðu upphafsstafirnir á 70r og 71r (A í báðum tilvikum) endur-
nýttir úr fyrra lífi handritsins. Fyrirsagnir með rauðu bleki eru í þriðju línu á 70r og annarri
línu á 71r en blekið hefur dofnað mjög og ógjörningur er að lesa úr því sem þar stendur.
61 Á 69r eru hreinir ferningar án þess að strik komi úr þeim að ofan- eða neðanverðu, og
engin lóðrétt strik afmarka þær nótur sem tilheyra hverju orði fyrir sig. Sama virðist hafa
verið raunin á 72v. Á 69v, 70v, 71r–v, 72r og neðri hluta 70r eru halar bæði ofan og neðan
úr nótum auk þess sem lóðrétt strik afmarka nótur fyrir hvert orð. í fyrstu tveimur nótna-
strengjum á 70r eru langir halar neðan úr nótunum en aðeins hægra megin, og engin lóðrétt
strik milli orða.
Dý rLIngar og DagLEgt BrauÐ Í LangaDaL