Milli mála - 2020, Blaðsíða 35

Milli mála 12/2020 35
KRISTÍN INGVARSDÓTTIR

10.33112/millimala.12.1
lega í mánaðartímaritinu Vox Catholica þar sem Jón/Nonni er
áberandi í næstum hverju einasta hefti meðan á Japansdvölinni stóð.
Hér kennir ýmissa grasa: Birtar eru myndir af Jóni með ýmsum
gestum háskólans eða frá fyrirlestrum hans; Jón er fenginn til að
segja frá ýmsu sem á daga hans hefur drifið um ævina og stundum
eru sögurnar það sem kalla mætti „sögur af frægu fólki“. Þannig er
fjallað um hvert Jón fer og hvern hann hittir, og greint frá ýmsum
smáatvikum sem aðeins eru áhugaverð þegar þekktur einstaklingur
á í hlut. Jafnframt birtist frásögn af ferð Jóns á hestbaki í kringum
Ísland sem raðsaga í þremur hlutum og saga kölluð Ævintýri á sjó,
sem byggð er á Ævintýri Nonna og Manna, birtist einnig sem raðsaga.
Stórar andlitsmyndir af Jóni birtast oft með greinum um eða eftir
hann enda þótt lítið sé alla jafna af ljósmyndum í tímaritinu. Margar
greinar birtast einnig í fréttablaðinu og í Umi no Hoshi en virðast ekki
jafn tíðar og í Vox Catholica. Það er því ekki að undra að Japanir á
ýmsum aldri kannist við Jón og gefi sig oft á tal við hann á manna-
mótum. Áskrifendum þessara tímarita hefur væntanlega liðið eins og
þeir þekktu manninn eftir svo tíðar fréttir af honum og það er erfitt
að ímynda sér að Japansdvöl Jóns hafi farið fram hjá neinum í hinu
fámenna samfélagi kaþólskra í Japan.
5.2. Tímarit fyrir börn og ungmenni: Sagnameistarinn
Í þessum flokki eru fallega skreyttar myndabækur og barnatímarit í
háum gæðum, enda um að ræða þekktar útgáfur sem nutu mikilla
vinsælda í Japan á millistríðsárunum. Greinarhöfundur hefur fyrst og
fremst kannað þau tímarit sem finnast í Nonnasafni Landsbókasafns
en það eru tímarit sem Jón flutti með sér heim til Evrópu. Ekki hefur
enn gefist tóm til að leita að fleiri ritum af þessu tagi í Japan og því
er ekki útilokað að umfjöllun kunni að leynast í fleiri ritum. Líklegt
er að Jón hafi tekið einmitt þessi rit með sér vegna þess að mikið var
í tímaritin lagt og vegna þess að hann hafi orðið þess vís að þau áttu
vinsældum að fagna í Japan.63 Í þessum flokki ber fyrst að telja tíma-
ritin Kodomo no Tomo (Vinur barnsins), Kodomo no Kuni (Barnalandið)
og Yonen Kurabu (Krakkaklúbburinn) sem voru stöndug tímarit með
63 Nokkur af kaþólsku mánaðartímaritunum eru einnig í Nonnasafni Landsbókasafns en engin af
dagblöðunum, að undanskildu dreifibréfinu með ensku greininni í The Japan Advertiser.