Andvari - 01.08.1961, Page 32

SIGURÐUR EINARSSON:
Sorgin, sem býr í augum þínum
Sorgin, sem býr í augum þínum,
er ekki myrk eins og undirdjúp hafsins,
ekki köld eins og blástirnd frostnótt.
Nei,
hún er björt eins og hásumardagur
því hún er svipur hvítrar, tindrandi gleði,
hvítrar, dáinnar gleði,
sem eitt sinn
átti höll sína í hjarta þér
og skoðaði dýrð veraldarinnar
þínum augum.
Sorgin, sem býr í augum þínum,
er ekki mállaus eins og fórnarlamb,
ekki þögul eins og kvölin,
sem hvorki á sér miskunn hins hljóða gráts
né fró hins skerandi kveins.
Nei,
hún kveður við titrandi strengi
um hina miklu, hvítu gleði,
sem eitt sinn fagnaði í hjarta þér
og lofsöng dýrð veraldarinnar
þínum munni.