Múlaþing: byggðasögurit Austurlands - 01.01.1984, Page 186
184
MULAÞING
firðinum. Það var tignarleg sjón sem setti einstæðan svip á allan
Fáskrúðsfjörð. Litlu síðar kom veiðiflotinn frá Dunkerque og voru
skipin þá orðin nærri tuttugu að tölu. I hagstæðum byr má einatt sjá
milli fimmtán og tuttugu skip sigla inn fjörðinn á einum degi.
En hvaða erindi áttu öll þessi skip hingað og hvað höfðu sjómennirnir
sjálfir fyrir stafni? Þetta kann að virðast einkennileg spurning því að
auðvitað þurfa veslings sjómennirnir á hvíld að halda eftir þriggja
mánaða strit á sjónum. Ég er sama sinnis og þú, lesari góður, en þetta
er þó ekki höfuðtilgangur komunnar hingað. Þrældómurinn heldur
áfram því að ýmist þurfa þeir að sækja vatn í land til þess að geta haldið
veiðunum áfram eða umhlaða fullverkaðan fisk á milli skipa. Utgerðar-
mennirnir senda svokallaða ,,Chasseurs“\ hraðskreið flutningaskip, til
þess að sækja aflann saltaðan um borð í skútunum. „Les Chasseurs“
koma líka með salt og aðrar nauðsynjar svo að veiðum verði haldið
áfram. Standi maður á ströndinni má heyra sérkennilegan talningar-
máta þar sem þulið er í síbylju við sjómannalag sem lýkur ekki fyrr en
búið er að umhlaða allt að tuttugu og sjö þúsund fiskum milli skipa.
Þannig tekur hvert skipið við af öðru þar til verkinu er að fullu fokið.
Að svo búnu erú skipin þvegin hátt og lágt og saftinu úr flutninga-
skipinu mokað um borð í skúturnar eftir því sem aðstæður leyfa.
Skipin frá Dunkerque notast ekki við slík flutningaskip eða
,,Chasseurs“. Þar er þorskurinn settur í tunnur og stdtaður í pækil.
Fiskurinn sígur smátt og smátt saman og þá halda skipin til Fáskrúðs-
fjarðar með aflann þar sem tunnurnar eru fylltar. Vinnan við þennan
verkunarmáta er miklu meiri, og þess vegna afla skipin frá Dunkerque
miklu minna en þau frá Paimpol. Sjómennirnir frá Dunkerque láta
þetta þó ekki á sig fá því að þeir vita sem er, að þeirra framleiðsla er
bæði betri og verðmeiri.
Dunkerquebúar ganga jafnan í trésóluðum knéstígvélum þar sem
Paimpolmenn láta sér nægja venjulega tréklossa. Ekki veit ég hvort
þetta er gert til þess að vekja sérstaka athygli á því að þeir veiði fyrir
fínni markaði eða til þess eins að sýna að þeir séu stórborgarbúar. Hitt
er víst að fótatakið hljómar svo til alveg eins, líkt og verið sé að draga
fallbyssu í vígstöðu.
Þegar mikið var um skipakomur og tími leyfði var ræðismaðurinn
stundum svo vinsamlegur að bjóða okkur í róðrarferð að skipunum og
umhverfis þau. Þetta voru auðvitað skemmtiferðir sem gátu þó að
sumra áliti naumast talist sæmandi þegar nunnurnar áttu í hlut. En þeir
1 Dregið af sögninni chasser: að elta einhvern.