Skagfirðingabók - 01.01.2016, Síða 87

SAGNIR ÚR FLJÓTUM
87
Þau Halldór og Guðrún áttu börn
saman og var eitt þeirra Guðrún [gift
Stefáni Hermannssyni. Þau voru foreldr-
ar Þórarins í Þrastarstaðagerði], sú er
vitskert varð og dó síðar í Haganesi hjá
Sveini Sveinssyni og Helgu konu hans
Gunnlaugsdóttur, Björnssonar, Illuga-
sonar, þess er riðinn var við Reynistaðar
líkamál, en þau Sveinn og Guðrún
voru systkinabörn, svo sem fyrr er sagt.
Önnur Guðrún dóttir þeirra giftist síðar
norður í Svarfaðardal og bjó langa hríð
í Hrappstaðakoti og þótti hin merkasta
kona.
Halldór giftist í annað sinn konu þeirri
er Rósa hét Hermannsdóttir. Var hún
áður gift manni þeim er Einar Jakobsson
hét og bjuggu þau í Ólafsfirði. Rósa var
mesta fríðleikskona og felldi Halldór
ástarhug til hennar meðan hún bjó með
fyrra manni sínum og fékk því til leiðar
komið að þau Einar réðust að Tungu, en
þá var Halldór búinn að missa Guðrúnu
fyrri konu sína. Rósa var þá kona á
ungum aldri og hafði gift verið skamma
stund, og þótti hún heldur vargefin af
Einari, því hann var eigi skörugmenni.
Eigi höfðu þau Einar og Rósa lengi
dvalið í Tungu er Halldór bóndi fyrirbauð
Einari að samrekkja konu sinni. Hraktist
Einar þaðan brátt og aftur til Ólafsfjarðar
og dvaldi þar og var talinn eftir þetta eigi
með heilum sönsum. En Halldór reið
um sumarið eftir á fund amtmanns og
fékk skilnað þeirra Rósu og hans [Einars]
og gekk sjálfur skömmu síðar að eiga
Loftsýn yfir Tungudal í Stíflu. Hann er fjögurra kílómetra langur frá Tungu inn að
Tungudalsvatni sem sést í botni dalsins. Inn á myndina er merkt hvar stóðu bæirnir, Tunga
(1), Hringur (2) og Háakot (3).
Ljósm.: Hjalti Pálsson.
12
3