Tímarit Máls og menningar - 01.02.2011, Page 67

TMM 2011 · 1 67
Hjörleifur Stefánsson
Akademískt torf
Nýlega birti Sigurjón Baldur Hafsteinsson grein um mikilvægan þátt í
minjavörslu Íslands. Sigurjón er lektor við Háskóla Íslands og greinin
rituð í tengslum við starf hans þar og því er henni vafalítið ætlað að
vera vísindagrein, þ.e.a.s. uppfylla kröfur um fræðileg eða vísindaleg
vinnubrögð.
Greinina ritar Sigurjón á ensku og má ætla að það sé gert í þeim til-
gangi að hún verði víðlesin eða að minnsta kosti að hún komi fyrir sjónir
erlendra fræðimanna. Greinin heitir „Museum Politics and Turf-house
Heritage“ og var lögð fram á ráðstefnu Félagsvísindastofnunar Háskóla
Íslands 29. október 2010 sem nefndist Þjóðarspegillinn 2010. Hana er að
finna á skemman.is, rafrænu gagnasafni Háskóla Íslands.
Fyrir okkur sem höfum áhuga á minjavörslu í víðu samhengi og sér-
staklega fyrir þá sem áhuga hafa á því að þeim fáu torfhúsum sem enn
eru til í landinu verði haldið sómasamlega við ætti að vera fagnaðarefni
að fræðimaður sýni málefninu áhuga og riti um það og birti hugleiðingar
og skoðanir. Full þörf er á því að menn skiptist á skoðunum um margt
sem kann að orka tvímælis í þeirri vinnu sem hefur átt sér stað á þessu
sviði og reyndar einnig það sem gert er um þessar mundir.
Grein Sigurjóns er hins vegar rituð af lítilli þekkingu. Hún varpar
alls ekki ljósi á þau málefni sem henni er ætlað að fjalla um og víða eru
dregnar rangar ályktanir. Svo rammt kveður að þessu að „kjánahroll“
setur að manni við lesturinn. Því fer hins vegar fjarri að allt sé rangt sem
í henni er sagt og auðvitað gefur hún fullt tilefni til andmæla og að því
leyti er hún af hinu góða að af henni geta sprottið samræður.
Hér verður á eftir drepið á ýmis atriði í grein Sigurjóns þar sem ranglega
er farið með staðreyndir, rangar ályktanir dregnar og/eða þörf er á leið-
réttingu án þess þó að efnið sé tæmt.