Tímarit Máls og menningar - 01.02.2011, Blaðsíða 115

Á r H a l l d ó r s o g Vi l h j á l m s
TMM 2011 · 1 115
Það var meiri ró yfir viðtökum gagnrýnenda við Íslandsklukkunni en
Gerplu og áhorfendur fögnuðu henni líka. Hún gengur enn fyrir fullu
húsi þegar þetta er skrifað.
Glens með broddi
Fyndnasta verk ársins var Hænuungarnir, leikrit Braga Ólafssonar sem
gerist að mestu á húsfundi í fjórbýlishúsi í Hlíðunum eftir að frosnir
kjúklingar hafa horfið úr frystikistu Sigurhans og Olgu, hjónanna á
neðri hæð til vinstri. Börkur Jónsson byggði þetta hús á sviðinu í Kassa
Þjóðleikhússins og það var hvað eftir annað hreinasti senuþjófur – þegar
allt í einu kviknaði ljós uppi á lofti meðan við vorum öll að fylgjast með
því sem gerðist niðri eða þegar ófrómt fólk fór inn í íbúðina niðri til
hægri meðan íbúar hennar voru á húsfundinum til vinstri … Stefán
Jónsson stýrði hópi úrvalsleikara sem allir fóru fram úr sjálfum sér
í þessu dýrlega stykki. Eggert Þorleifsson lék Sigurhans, mann sem
áhorfendur langaði mest til að rassskella þegar fram í sótti, og var
ótrúlega fyndinn og óþolandi en ennþá makalausari var þó Kristbjörg
Kjeld. Hún lék Elínu gömlu á efri hæðinni sem aldrei veit til hvers hún
er á þessum húsfundi en nýtir sér aðstæðurnar til alls sem henni finnst
skemmtilegast – og fékk Grímuna fyrir vikið.
Hænuungarnir fengu geysilega góðar viðtökur, stjörnufjöld og enda-
lausa aðsókn enda meistaraleg meðferð á meistaralegum texta. Þegar
þessar línur eru skrifaðar er verið að hætta sýningum (í bili?) fyrir troð-
fullu húsi.
Skemmtileg var líka sýningin á Gauragangi eftir Ólaf Hauk Símonar-
son á stóra sviði Borgarleikhússins. Þar fékk Guðjón Davíð Karlsson
að leika hinn óviðjafnanlega Orm Óðinsson, samnefnara allra gáfaðra
og kaldhæðinna unglingsstráka og orðheppnasta ungling íslenskra
bókmennta. Töffarinn Ormur var lifandi kominn á sviðinu í meðförum
hans en það vantaði svolítið upp á dýptina, ég skynjaði ekki kvikuna
undir niðri eins sterkt og í sögunni. En gagnrýnendur voru hrifnir og
áhorfendur flykktust á sýninguna mánuðum saman enda var þetta
úrvals fjölskyldusýning og það var ekki boðið upp á mikið fyrir stálpaða
krakka og unglinga á árinu 2010.
Dramatískt gamanleikrit frá Þýskalandi, Dúfurnar eftir David Giesel-
man, dillaði áhorfendum á nýja sviði Borgarleikhússins um það leyti
sem Rannsóknarskýrsla Alþingis kom út. Það fjallar um auðmann sem
er orðinn leiður á því að vera fínn forstjóri eigin fyrirtækis og þráir
einfalt líf við dúfnarækt. Kristín Eysteinsdóttir stýrði Hilmi Snæ og