Tímarit Máls og menningar - 01.02.2016, Blaðsíða 17

TMM 2016 · 1 17
Kristín Ómarsdóttir
Ég gæti aldrei valið eitt orð
Viðtal við Rögnu Sigurðardóttur
Fyrsta bók Rögnu Sigurðardóttur kom út þegar hún var tuttugu og fjögurra
ára gömul og nam við Myndlista- og handíðaskólann sem um aldamótin
varð Listaháskóli Íslands. Bókin heitir Stefnumót, safn örsagna og svífandi
teikninga, blá á lit, lillabláar síður. Fallegri en flugeldar kom út tveimur árum
síðar (1989), hvít að lit og inniheldur ljóð eða prósa. 27 herbergi (1991) er sett
saman úr ljóðrænum textum og ljósmyndum af hótelherbergjum. Eftir það
hefur Ragna helgað sig skáldsöguritun, hún á að baki fimm skáldsögur og
hefur nýlokið við þá sjöttu.
Stíll Rögnu er í senn nálægur og fjarlægur og augljós áhrif frá mynd-
listarnámi í fyrstu verkum renna með árunum saman við hefðbundin
skáldsagnaskrif. Umgengnin við orðin er efnisleg, líkt og orðin væru úr
snertiefni, hún er meðvituð um formið sem hún vinnur í og stefnir oft and-
stæðum saman á jarðbundinn hátt – hún ræður yfir bókmenntalegri verk-
fræði sem líkist engri annarri. Skáldsögurnar marka spor í skáldsagnaritun
á íslensku og gæta þess að þráðurinn milli fortíðar og framtíðar slitni ekki.
Ragna hefur einnig starfað við þýðingar, myndlistargagnrýni, fræðileg skrif
um listir og við kennslu. Hún hefur hlotið tilnefningar fyrir ritstörf sín. Hið
fullkomna landslag kom út í enskri þýðingu í Bandaríkjunum árið 2012.
***
Takk fyrir að koma í viðtal við mig fyrir Tímarit Máls og menningar.
Ragna, viltu segja mér hvar þú ert fædd og hvenær, hvað heitir mamma þín,
hvað heitir pabbi þinn, áttu systkini, hvað heita þau – ef þú kærir þig um að
svara því – hvar í röðinni ertu fædd og hvar ólstu upp?
Þakka þér fyrir að bjóða mér, gaman að fá að spjalla við þig. Foreldrar
mínir heita Anna María Þórisdóttir og Sigurður Sigfússon. Þau eru á
níræðisaldri, búa sjálf og sjá um sig sjálf og eru við ágæta heilsu. Ég á tvær
eldri systur. Arnfríði sem er arkitekt og Sigríði sem er félagsráðgjafi og náms-
ráðgjafi. Ég er fædd í Reykjavík árið 1962.
Og elst upp í Reykjavík?
Já, fyrstu sex árin mín leigðu foreldrar mínir jarðhæð á Tjarnargötu 40, við