Árbók Hins íslenzka fornleifafélags - 01.01.1973, Side 154

154
ÁRBÓK FORNLEIFAFÉLAGSINS
Margrét Hermannsdóttir lauk rannsókn rústanna í Herjólfsdal í
Vestmannaeyjum, sem frá var skýrt í síðustu skýrslu, og virðist
þar vera um forna byggð að ræða. Þar kom í ljós skáli og þrjú hús
önnur, þar á meðal fjós. Ekki er hægt að gera sér fyllilega grein
fyrir öllum rústunum, nema fjósinu, sem var mjög skýrt, en að
líkindum er þarna um að ræða sögualdarbyggð. — Rannsókn þessi
var gerð á vegum bæjarstjórnar Vestmannaeyja og kostuð af henni.
Ferðir safnmanna.
Ferðir safnmanna innanlands til eftirlits og athugunar á forn-
minjum og friðlýstum stöðum voru svipaðar og verið hefur, og er
ekki ástæða til að fjalla um þær sérstaklega, fram yfir það sem
annars staðar kemur fram í skýrslunni, en um utanlandsferðir er
þetta að segja:
Gísli Gestsson safnvörður og Sveinn Torfi Sveinsson verkfræð-
ingur fóru ferð saman dagana 4.3.—14.3. til Danmerkur, Noregs og
Svíþjóðar til að kynnast tæknibúnaði safna, svo sem hita- og raka-
kerfum, öryggiskerfum, ljósatækjum og öðru, sem nauðsynlegt þótti
að þekkja til í sambandi við hina miklu viðgerð, sem stendur yfir
á safnhúsinu. Komu þeir í öll helztu söfn í þessum löndum og öfl-
uðu sér þeirrar vitneskju, sem völ var á í þessu sambandi.
Árni Björnsson safnvörður sótti fund fulltrúa norrænna safn-
manna í Lundi 19.—20. júní, en um þær mundir var hann á ferð
á eigin vegum þar ytra.
Þjóðminjaverði var boðið að vera við opnun sýningarinnar Middel-
alderkunst fra Norge i andre land, í Universitetets Oldsaksamling í
Oslo 23. marz, en safnið hafði lánað þangað miðaldakaleika frá Mel-
stað, Prestbakka og Kálfafelli, auk þess sem Hóladómkirkja lánaði
hina fornu kaleika sína á sýninguna. Var sýning þessi með afbrigð-
um glæsileg, en hún var haldin til að minnast 1100 ára konung-
dæmis í Noregi. Vöktu íslenzku kaleikarnir mikla athygli á sýn-
ingunni, enda fáar hliðstæður þeirra þekktar.
Þá sótti þjóðminjavörður fund í Mariefred í Svíþjóð 4. febrúar
vegna undirbúnings sýningar um timburhús á Norðurlöndum.
Viöhald gamalla bygginga.
Viðhald gömlu bygginganna var með svipuðu sniði og verið hefur.
Mest voru það árleg viðgerðastörf, sem framkvæmd voru, en ekki
var ráðizt í neitt nývirki af því tagi. Hins vegar náðist umtalsverð-