Andvari - 01.01.2007, Blaðsíða 53

andvari
KATRI'N THORODDSEN
51
herir Breta og Bandaríkjamanna létu eftir sig.168 í þessari ræðu nefndi
Katrín að áleitni geðbilaðra manna og unglinga á smástúlkur 2-5 ára
og raunar drengi líka væri miklu tíðari en marga grunaði.169 Þessi
ummæli Katrínar hefðu mátt hljóta meiri athygli en það var langt í að
kynferðisleg misnotkun á börnum kæmist á dagskrá. Slík mál voru ekki
til umræðu.
Sólveig Einarsdóttir, dóttir stjórnmálaforingjans Einars Olgeirssonar
og Sigríðar konu hans, segir frá því að hún hafi sótt fast að fá að fara í
sveit en móðir hennar neitaði henni um það. Sólveigu fannst hún beitt
órétti því bróðir hennar fékk að fara. Löngu síðar sagði móðir hennar
að Katrín Thoroddsen, sem var bæði heimilisvinur og læknir fjölskyld-
unnar, hefði ráðið sér eindregið frá því: „Katrín hafði rekist á of mörg
dæmi um kynferðislega misnotkun stúlkubarna til þess að hún vildi að
ég yrði send til vandalausra.“170
Frumvarp Katrínar um dagheimilin fór til nefndar og kom þaðan
aftur með verulegum breytingum sem drógu mjög úr ábyrgð stjórn-
valda. Samkvæmt þeim þurfti að meta þörf á dagheimilum og koma
með tillögur um að þau yrðu byggð og að tryggja fjármagn til þeirra
á fjárlögum. Eins og í fyrstu umræðu ræddi Katrín ein um málið sem
sýnir áhugaleysi þingmanna, einnig flokksbræðra hennar. í síðari ræðu
sinni rökstuddi Katrín nauðsyn dagheimila með hárri slysatíðni barna.
Það yrði að koma þeim í skjól. Eftir ræðu hennar var umræðum frestað
og kom málið ekki aftur á dagskrá.
Enn eitt merkilegt mál sem Katrín ræddi á fyrsta þingi sínu 1946 og
lagði fram tillögu um var sérsköttun hjóna. Hún vildi að giftar konur
væru sjálfstæðir skattgreiðendur enda kæmi sér illa fyrir margar þeirra
þegar tekjur hjóna væru lagðar saman, skattar kvenna yrðu hærri fyrir
vikið, vegna mikils launamunar. Þetta var líka sjálfstæðismál að hennar
mati og baráttumál Kvenréttindafélagsins en það náði ekki fram að
ganga.171 Það fór eins um þetta mál eins og fleiri baráttumál Katrínar.
Enginn tók undir frumvarpið, því var vísað til nefndar og sofnaði þar.
Katrín talaði fyrir daufum eyrum þingmanna þegar hagsmunamál
kvenna áttu í hlut sem hlýtur að hafa verið henni erfitt eftir að hafa lagt
mikla vinnu í viðamikil frumvörp.172