Andvari - 01.01.2007, Blaðsíða 23

ANDVARI
KATRÍN THORODDSEN
21
lést, aðeins 57 ára að aldri, en hann hafði lengi átt við veikindi að
stríða. Theodora var orðin ekkja með fullt hús af börnum sem voru þó
að halda út í heim eitt af öðru. Hún bjó við góð efni og seldi smátt og
smátt eignirnar til að sjá sér og börnum sínum farborða og kosta nám
þeirra.41
Haustið 1918 geisaði spænska veikin og lagðist allt heimilisfólkið í
Vonarstræti 12, nema þær Theodora og Bauja. Þegar Katrín var risin
úr rekkju bauð læknaneminn sig fram sem sjálfboðaliða við hjúkrun
sjúklinga í Miðbæjarskólanum sem breytt hafði verið í sjúkrahús. Um
það bil sem veikin var að ganga yfir varð sá stóratburður í sögu íslands
að það varð frjálst og fullvalda ríki í konungssambandi við Danmörku.
Sigurður bróðir Katrínar var viðstaddur athöfnina við stjórnarráðshúsið
en þar var fremur fámennt vegna spænsku veikinnar.42 Þegar hér var
komið sögu var heimsstyrjöldinni lokið en vopnahlé gekk í gildi 11.
nóvember 1918.
Katrín lauk læknanámi í byrjun árs 1921 með fyrstu einkunn og
hélt þegar til útlanda í framhaldsnám. Hún lagði áherslu á fæðingar-
og barnalækningar. Fyrst lá leiðin til Noregs þar sem hún vann sem
kandidat á Ullevál sjúkrahúsinu í Osló frá apríl og fram í desember.
Þá fór hún til Bergen þar sem hún var við störf á Haukeland sjúkra-
húsinu frá janúar til desember 1922 43 Meðan Katrín var í Noregi tók
Theodora virkan þátt í stjórnmálabaráttunni. Hún var í fjórða sæti
kvennalistans sem bauð fram til Alþingis í landskjörinu sumarið 1922
en hann fékk einn fulltrúa kjörinn, Ingibjörgu H. Bjarnason skólastjóra
Kvennaskólans í Reykjavík.44
í byrjun árs 1923 lá leið Katrínar til Kaupmannahafnar til að vinna
þar í einn mánuð á Ríkisspítalanum. Þegar hún kom til Hafnar voru þar
fyrir bræður hennar Bolli og Sigurður sem báðir stunduðu nám í verk-
fræði. Sigurður segir frá því hve gaman var að fá systkinin í heimsókn
á þessum árum en auk Katrínar áttu þau Guðmundur og Kristín leið
um Kaupmannahöfn: „Auk þess hve ánægjulegt það var að fá systurnar
í heimsókn nutum við líka góðs af því. Katrín trommaði okkur út á
ýmsa skemmtistaði, jafnvel leikhús, og gaf okkur að éta góðan mat.‘45
Eftir Hafnarvistina hélt Katrín til Berlínar þar sem hún vann á Kaiserin
Augusta Victoria Krankenhaus og Charité Krankenhaus það sem eftir
lifði ársins 46