Árbók Hins íslenzka fornleifafélags - 01.01.2011, Page 196

PÁLSTÓFTIR 195
linsum úr ösku úr eldstæðum. Þau hafa eflaust orðið til þannig að ösku úr
eldstæðum í húsunum I og IV var fleygt þar út. Tvær skýringar eru hugsanlegar
á því að langmest af gripum og dýrabeinum skuli finnast í þessum lögum.
Annað hvort hafa gripirnir borist þangað með ösku úr eldstæðum og hafa
því verið inni í húsunum, eða þeir hafa verið notaðir utan dyra og glatast
þar. Enginn af hlutunum og lítið af dýrabeinunum ber þess nokkur merki
að hafa verið í eldi og því er líklegra að hlutirnir hafi týnst eða verið fleygt
utan dyra, nema því aðeins að lögin utan dyra hafi myndast við að gólfskánir
hafi verið stungnar út. Bæði dýrabein og gripir koma einkum úr tveimur
þyrpingum við dyrnar á þessum tveim húsum, svo að vel getur verið að
þeim hafi í raun verið hent út úr húsunum. Reyndar hefur varla verið mjög
hentugt að fleygja rusli beint fyrir framan húsin þar sem umgangur þurfti að
vera greiður. Líklegra er að mest af daglegri iðju hafi farið fram utan dyra í
birtu og undir beru lofti, frekar en inni í dimmum og þröngum vistarverum.
Einkum á þetta við um sumrin, en ætla má að einkum hafi verið búið á
þessum stað að sumarlagi. Því leikur vafi á því hvort fundnir gripir hafa
verið notaðir inni eða úti, en við getum enn velt því fyrir okkur að hverju
var unnið. Af gripum voru það helst steinflísar sem fundust í þessum lögum
utan dyra. Flestar flísarnar eru trúlega slegnar af eldtinnu, en a.m.k. tvær báru
greinileg slitmerki eftir notkun. Þær voru skoðaðar með mikilli stækkun og
þó að niðurstöður séu ekki óyggjandi líktust slitmerkin mest þeim merkjum
sem verða við að skera í skeljar eða mjúkar steintegundir (Chabot 2007).
Hvorki kléberg né skeljar fundust á staðnum, og vera má að svipuð merki
geti komið af vinnu í annan efnivið.
Tafla 2. Yfirlit yfir gripi sem fundust á Pálstóftum. Langflestir fundust á svæðinu
vestan og utan við helstu mannvirkin. Undantekningar eru þrjár steinflísar (í
mannvirki I), koparþynna (mannvirki IV) og endi á járnnagla (bygging IV).

Gripir Magn
Mynt (Haraldur harðráði 1047-1066) 2 (heilar en gataðar)
Koparþynna 1 (heil)
Afgangsbrot úr koparblöndu 1
Hnappur úr koparblöndu 1 (heill)
Deigla 1 (3 brot sem passa saman)
Járnnagli 2 (1 heill, 1 brot)
Síll úr járni 1 (3 brot sem passa saman)
Marglit glerperla (Callmer gerð B090) 1 (hálf)
Náttúrulegir steinar, aðfluttir (kvarts) 6
Steinflísar (8 jaspis; 9 kvarts) 15