Breiðfirðingur - 01.04.1982, Blaðsíða 98

96 BREIÐFIRÐINGUR
mína, sem átti heima í Hafnarfirði. Hún var þá trúlofuð B.M.
Sæberg, bifreiðastjóra. Skeyti hafði verið sent til þeirra um að ég
væri að koma. Ég fór suður með gufuskipinu Sterling, sem var
víst nokkuð stórt. En tvær urðum við að vera í sömu koju.
Konuna, sem ég svaf hjá, þekkti ég ekki neitt, en hún var mjög
þægileg. Við komum snemma morguns til Reykjavíkur. Allir
flýttu sér í land. Bílar komu rúllandi niður að skipi og sóttu fólk,
en hvergi sá ég systur mína né tilvonandi mág. Þarna stóð ég á
dekkinu eins og nátttröll, sem dagað hafði uppi. Þegar komið var
hádegi, sá ég að svona gat þetta ekki gengið. Ég fór því upp á
hafnargarðinn. Þar stóð kona með litla stúlku sér við hönd. Mér
var ljóst að nú var annaðhvort að duga eða drepast. Ég sveif á
konuna, og spurði, hvort hún vissi, hvar Laufásvegur 4 væri.
Þar bjó Guðmundur Breiðfjörð, en hann var vinur föður míns.
Hún kvaðst vita það, og bauðst til að fylgja mér þangað. Oft
hefur mér verið hugsað til þessarar góðu konu, og bið ég Guð að
blessa hana og barnið, hvort sem þær eru lífs eða liðnar. Þetta
var á sunnudegi, og er að Laufásveg 4 kom, opnaðist mér heill
heimur af elskulegheitum. Frú Guðrún tók mér opnum örmum,
og leiddi mig að borði fullu af dýrindis mat. Mér fannst sem ég
væri komin til himnaríkis og fólkið væri englar. Þannig verkuðu
viðtökurnar hjá hjónunum og börnum þeirra tveimur á mig,
Dórótheu, sem var á líkum aldri og ég, og Agnari, sem var yngri.
Frú Guðrún reyndi án árangurs að hringja í systur mína, en hún
hafði farið úr Hafnarfirði og aldrei fengið skeytið. I heila viku
mátti Breiðfjörðsfjölskyldan sitja uppi með þetta viðundur, sem
rekið hafði á fjörur hennar. Thea, eins og hún var kölluð, varð
síðar kona Þorsteins O. Stephensens, leikara. Mér er
minnisstætt, hve falleg og fín hún var, og hún var svo góð við
mig, var alltaf að greiða mér og punta mig. Loks rann upp sá
dagur, er Sæberg kom og sótti mig. Þröngt var í bílnum. Maggi
minn, þú situr undir telpunni, sagði hann við ungan pilt, sem sat