Andvari - 01.01.2007, Side 28

26
KRISTlN ástgeirsdóttir
ANDVARI
til eru af Katrínu sem samsvaraði sér vel en þannig minntist hann
hennar, kannski meira í gríni en alvöru. Það kom fram hjá Skúla að
Katrínu fannst gott í staupinu en ekki var það til vandræða. Hann segir
líka að hún hafi reykt þrjá pakka af tyrkneskum sígarettum á dag.65
Þetta var lífsstíll „nýju konunnar“.
Á þessum tíma ríkti áfengisbann á íslandi nema hvað búið var að
heimila innflutning á svokölluðum Spánarvínum vegna þrýstings frá
Spánverjum sem hótuðu að stöðva innflutning á saltfiski ef Islendingar
keyptu ekki af þeim vörur.66 Læknar og lyfsalar höfðu þó aðgang að
spíritus af læknisfræðilegum ástæðum og gátu læknar ávísað lyfseðlum
á áfengi. Sumum þótti drykkjuskapur lækna sjálfra um of og lagði
Gunnlaugur Claessen læknir fram tillögu á fundi lækna um að þessi
heimild yrði afnumin en ekki varð úr því.67 Katrín gat því séð sjálfri sér
fyrir áfengi. Mikil ásókn var í spíritus læknanna og var Katrín ekki laus
við beiðnir um „hundaskammta“ eins og læknaspíritusinn var kallaður.
Skúli Halldórsson segir frá því að hann hafi hitt hinn fræga Snæbjörn
bónda í Hergilsey, frænda þeirra Katrínar, þegar hann kom til fundar
við lækninn. Hann var fílhraustur en kom til að fá áfengisskammtinn
sinn.68
Barnalœknir í Reykjavík
Katrín lét af störfum sem héraðslæknir í maí 1926 og flutti til Reykjavíkur
þar sem hún bjó eftir það. Hún hóf störf sem heimilislæknir auk þess sem
hún vann fyrir hjúkrunarfélagið Líkn. í nóvember þetta ár flutti hún fyr-
irlestur á fundi Læknafélags Reykjavíkur um niðurgang hjá ungbörnum
og ráð við honum. Katrín lagði greinilega sitt af mörkum til að fræða aðra
lækna um meðferð barna en hugsanlega voru skrif hennar og erindi hluti
af því að öðlast sérfræðingsleyfi sem barnalæknir. Það leyfi fékk hún 2.
maí 1927 fyrst íslenskra lækna. Hún hélt áfram að fræða lækna og skrif-
aði greinar í Lœknabladid næstu árin meðal annars um hægðatregðu,
blóðleysi, beinkröm meðal barna og „coeliaki“.69 Katrín mætti fyrst
kvenna á aðalfund Læknafélags Islands árið 1927™
Nokkru eftir að Katrín flutti til Reykjavíkur tók hún þátt í stofnun
Félags íslenskra háskólakvenna en meðal annarra stofnenda voru þær
Laufey Valdimarsdóttir, Anna Bjarnadóttir og Björg Þorláksson sem
var aðalhvatamaður að stofnun þess. Félagið var stofnað árið 1928 en