Uppeldi og menntun - 01.09.1993, Side 7

FRÁ RITNEFND
í nóvember á síðastliðnu ári kom út afmælisrit tileinkað Jónasi Pálssyni sjötugum
og var það fyrsti árgangur tímarits Kennaraháskóla Islands Uppeldi og menntun.
Akveðið var að afmælisritið hefði nokkra sérstöðu. Fjöldi fólks óskaði eftir að skrifa
í það greinar til að heiðra afmælisbarnið og var efnisval því með öðrum hætti en
gjarnan á við um greinar í tímaritum af þessu tagi. Með því hefti sem nú lítur dags-
ins ljós má segja að framtíðarstefna sé mótuð um innihald og útlit tímaritsins.
Tímaritinu er ætlað að vera vettvangur fræðilegrar og hagnýtrar umfjöllunar
um efni tengt uppeldi og skólastarfi. Stefnt er að því að það höfði bæði til kennara
og fræðimanna á sviði uppeldis- og menntamála. Þar verði að finna margvíslegan
fróðleik og upplýsingar, og einnig efni sem er kennurum hvatning, hugvekja og
uppspretta hugmynda í starfi.
Tímaritið skiptist í þrjá meginhluta. I fyrsta hlutanum verða fræðigreinar og
gilda um þær ákveðnar reglur. Gerðar eru kröfur um fagleg vinnubrögð og fram-
setningu og að efni greinanna eigi erindi til kennara og annarra sem sinna uppeldis-
og kennslustörfum. I öðrum hluta eru frásagnir af skólastarfi, m.a. nýbreytni- og
þróunarstarfi af ýmsu tagi. Vonast er til að höfundar þeirra greina verði sem flestir
úr hópi kennara á öllum skólastigum. I seinasta hluta verða ritdómar og umfjöllun um
námsefni.
Efni þessa árgangs er mjög fjölbreytt. Höfundar fræðigreina fjalla aðallega um
eigin rannsóknir, m.a. á þroska barna og aðstæðum nemenda í framhaldsskólum.
Nokkrar frásagnir eru af nýjungum í skólastarfi. Sem dæmi má nefna greinar um
tölvusamskipti nemenda, bæði í grunnskólum og Kennaraháskólanum.
Auðvelt reyndist að afla efnis í fræðilega hluta tímaritsins. Komust þar færri að
en vildu. Hingað til hefur lítið verið birt hér á landi af fræðilegum greinum um
uppeldis- og menntamál enda hefur ekki verið sérstakur vettvangur fyrir slíkt efni.
Sá áhugi sem fræðimenn hafa sýnt á að fá birtar greinar í tímaritinu er því afar
ánægjulegur. Fáar umsóknir bárust hins vegar um birtingu efnis í seinni hluta tíma-
ritsins og var í sumum tilvikum leitað til kennara og þeir beðnir að skrifa. Miklu
skiptir að í tímariti sem þessu sé varpað ljósi á uppeldi og menntun frá ólíkum
sjónarhornum. Kennarar eru því eindregið hvattir til að skrifa greinar í tímaritið.
Upplýsingar um það sem gerist í skólum verða fyrst og fremst að berast frá kennur-
um sjálfum. Þeir búa yfir dýrmætri reynslu sem nauðsynlegt er að færa í orð til að
draga megi af henni lærdóm. Kennarar mega ekki ætla fræðimönnum einum það
hlutverk að afla upplýsinga um skólastarf og koma þeim á framfæri.
Tímaritið mun mótast í samskiptum við lesendur sem eiga það sameiginlegt að
hafa áhuga á uppeldi og menntun. Við biðjum fræðimenn, kennara og aðra, sem
sinna uppeldisstörfum, um aðstoð við að koma á legg tímariti sem verði okkur öll-
um lyftistöng og vettvangur símenntunar í starfi.
F.h. ritnefndar, Ragnhildur Bjarnadóttir
ritstjóri
5