Ritröð Guðfræðistofnunar - 01.01.2011, Qupperneq 10

til Lúthers og kennivalds hans sem og nýjustu rannsókna í biblíufræðum til að styðja
gagnrýni sína.
Sólveig Anna Bóasdóttir fjallar í grein sinni Ábyrg og réttlát viðbrögð gagnvart
þolendum kynferðisofbeldis um hvað felst í því að kirkjan gerist miskunnsamur Samverji
gagnvart þolendum kynferðislegs ofbeldis. Greinin byggist á vinnu og rannsóknum
einnar virtustu fagmanneskju í heiminum á sviði fræðslu- og forvarnarmála um
kynferðislegt ofbeldi í trúarlegu samhengi, sem er dr. Marie M. Fortune, en hún mun
sækja Island heim og halda fyrirlestra og námskeið um þetta efni á hausti komanda.
Ahersla greinarinnar liggur einkum á tveimur guðfræðilegum hugtökum: Synd og
réttlæti og hvað þau merkja í samhengi kynferðislegrar misnotkunar í trúarlegu
samhengi. Að lokum er fjallað um merkingu fyrirgefningarinnar fyrir þolendur
kynferðislegs ofbeldis.
Það hefur verið stefna Ritraðarinnar að fjalla um doktorsritgerðir í guðfræði þegar
það á við. Nokkuð er liðið síðan þetta var síðast gert en í þessu hefti er bætt úr því og
fá þrjár nýlegar doktorsritgerðir íslenskra guðfræðinga umfjöllun að þessu sinni. Það
er von ritstjórnar Ritraðarinnar að slíkar umfjallanir gefi lesendum innsýn í það sem
er nýjast á sviði guðfræði og trúarbragðafræði hverju sinni. Dr. Gunnar Kristjánsson
prófastur fjallar um rannsóknarverkefni Sigríðar Guðmarsdóttur frá 2007 sem lagt
var fram við Drew háskólann í Bandaríkjunum, The Abyss of God: Flesh, Love and
Language in Paul Tillich, en ritgerðin er á sviði samstæðilegrar guðfræði og beinir
sjónum að hugtakinu hyldýpi Guðs hjá einum þekktasta guðfræðingi 20. aldarinnar,
Paul Tillich. Þá fjallar prófessor Ingólfur Ásgeir Jóhannesson um rannsóknarverkefni
Sigurðar Pálssonar, Kirkja og skóli á 20. öld. Staða og þróun kennslu í kristnum frœðum
og trúarbragðafrœðum á Islandi með samanburði við Danmórku, Noreg og Svíþjóð, frá
2008 en það verkefni var lagt fram við Kennaraháskóla Islands. Að lokum fjallar dr.
Sigríður Guðmarsdóttir, sóknarprestur um rannsóknarverkefni Hauks Inga Jónassonar
frá 2006, In a land of a Living God: The Healing Imagination and the Icelandic
Heritage, en þá rannsókn, sem er þverfræðileg og varðar bæði svið trúarbragðafræði og
geðsjúkdómafræði, varði Haukur Ingi við Union Theological Seminary í New York í
Bandaríkjunum.
Tveir ritdómar eru að lokum meðal þess efnis sem Ritröðin hefur upp á að bjóða
að þessu sinni. Prófessor Einar Sigurbjörnsson ritar annars vegar um bók Steinunnar
Jóhannesdóttur frá árinu 2010, Heimanfylgju en hún fjallar um æsku og uppvöxt hins
þekkta sálmaskálds, Hallgríms Péturssonar. Hins vegar fjallar Gunnlaugur A. Jónsson,
prófessor um skýringarrit Carol Meyers Exodus. The Cambridge Bible Commentary og
er það rit frá árinu 2005.
Á eitt hundrað ára afmælisári Háskóla íslands og þar með Guðfræðideildarinnar sem
er ein þriggja elstu deilda skólans er það von ritstjórnar Ritraðar Guðfrœðistofnunar að
það fjölbreytta efni sem hún inniheldur að þessu sinni megi nú sem endranær gleðja
og fræða lesendur hennar.
Sólveig Anna Bóasdóttir
8