Tímarit Máls og menningar - 01.02.2016, Qupperneq 87

D ý r g r i p i r ú r d j ú p i t í m a n s
TMM 2016 · 1 87
verður. Oft er ég að hugsa til þín þegar ég ligg andvaka á nóttunni og þá veit ég að þig
dreymir heim og þá finnast mér allir vegir færir:
Finnst mér þá ég flogið geti
Fjöllin yfir rétt í spretti
Enn hef ég ráð á hálfu feti
Hönd ef mér (ey?) drottinn rétti.
Fyrirgefðu draumóra mína. Svo slæ ég botninn í blaðið. Afi þinn og systur biðja
fjarska vel að heilsa þér og óska þér alls hins besta.
Svo bið ég alföðurinn að vera þér allt í öllu.
Mælir þín elskandi amma.
Getum má leiða að því að þessar línur séu ritaðar 1921.
Engin kona stóð Einari nær en María amma hans. Styrktust bönd þeirra
enn frekar veturinn 1914 þegar Einar hóf nám í Gagnfræðaskólanum á
Akureyri aðeins tólf ára gamall. Bjó hann þá hjá ömmu sinni í litla Norður-
ljósahúsinu sem Olgeir, sonur hennar, hafði keypt handa móður sinni árið
1900.
Annað gulnað bréf frá Maríu leyndist á kassabotninum. Er það dagsett
síðla árs 1922.
Heima 19. nóvember 1922.
Elsku Einar minn.
Hjartans þökk fyrir öll bréfin þín sem eru mér ætíð gleðiefni. Mér finnst ég hafa
ferðast með þér í sumar og ég set mig vel inn í fegurðartilfinning þína í kvöldkyrrðinni
því þá er fegurð náttúrunnar áhrifamest og hugleiðingarnar verða svo margvíslegar. Já,
elsku drengurinn minn, ó, hvað ég gleðst yfir framför þinni í öllum greinum. Ég hef
oft beðið guð að gefa þér styrk að stríða og forðast allar tálsnörur sem alls staðar eru
á heimsins vegi og ég treysti staðfastlega að hann bænheyri mig. Af okkur er ekkert
að frétta. Allt í deyfð og dáðleysi. Öngvar ráðagerðir og öngvar framkvæmdir. Heilsan
bærileg þegar tekið er tillit til áranna svo er það gott.
Nú er loks að mestu lokið endurbótum á Gagnfræðaskólanum. Komin næg ljós í
hann allan og miðstöðvarhiti og er það ákaflegur munur eða var, bæði með hreinlæti
og fleira. Rúna frænka þín átti eftir að vera þar einn vetur enn og er hún þar í vetur.
Hún verður aldrei útskrifuð þaðan. Hún biður hjartanlega að heilsa elsku drengnum
sínum og biður hann að fyrirgefa sér það sem lagt er í bréf þetta. Hún sagði að það
væru daglaunin sín 14. ágúst og hefði heitið þér þeim.
Ég vildi að ég gæti einhvern tímann klórað þér skárra bréf [en] sálin er víst ekki á
réttum stað eða þá sofandi.
Afi og systur senda þér ástríka kveðju en sjálf óska ég þér allrar blessunar fyrr og
síðar.
Þín vanmáttug amma María.
María fæddist 3. júlí 1848 og er því sjötíu og fjögurra ára gömul þegar hún
skrifar þetta bréf. Rúna frænka er Kristrún Júlíusdóttir, ein þriggja dætra
Maríu og Kristjáns Júlíusar Kristjánssonar, en synirnir urðu fimm og
komust öll börnin upp þrátt fyrir mikla fátækt. Einn son misstu þau María