Tímarit Máls og menningar - 01.03.2017, Page 79

TMM 2017 · 1 79
Edwin Arlington Robinson
Fjögur ljóð
Atli Harðarson þýddi
Edwin Arlington Robinson fæddist árið 1869 í Maine og dó í New York árið 1935. Hann
var með vinsælustu og virtustu ljóðskáldum Bandaríkjanna í byrjun síðustu aldar.
Fyrsta ljóðabók hans kom út 1896 og urðu útgefnar bækur með kveðskap hans nær
þrjátíu talsins áður en yfir lauk. Hann hlaut Pulitzer verðlaunin fyrir ljóðagerð þegar
þau voru veitt í fyrsta sinn árið 1922, og svo aftur bæði 1925 og 1928.
Faðir Robinsons var þokkalega stæður kaupmaður. Hann féll frá 1892 og næstu ár á
eftir bjó skáldið við fremur þröngan kost. Kjörin bötnuðu að mun árið 1904. Þá sat
Theodore Roosevelt í Hvíta húsinu – repúblikani sem las ljóð, vakti athygli á kveðskap
Robinsons og fékk honum launað embætti hjá tollinum. Mátti hann nota skrifborð sitt
þar til menningarlegri iðju en að afla fjár í ríkissjóð.
Nokkur af eftirminnilegustu kvæðum Robinsons fjalla um auðnu leys ingja og óska-
börn ógæfunnar sem sumir tengja við fólk frá æskustöðvum hans í bænum Gardiner í
Maine. Hér á eftir fara þýðingar á þrem af þeim þekktustu. Þau eru Ríkharður (Richard
Cory) úr bókinni The Children of the Night sem út kom 1897, Mangi Hró (Miniver
Cheevy) úr bókinni The Town Down the River sem út kom 1910 og var tileinkuð Theo-
dore Roosevelt og Veislan hjá Gvendi (Mr. Flood’s Party) úr bókinni Avon’s Harvest
sem út kom 1921.
Auk þessara þriggja mannlýsinga er hér þýðing á ljóðinu Cortège úr bókinni Captain
Craig sem út kom 1902. Sagan segir að Robinson hafi ort það árið 1890 í heldur úfnu
skapi þegar stúlkan sem hann unni giftist eldri bróður hans. Þau hjónakornin fóru frá
Maine til nýrra heimkynna í Missouri með lest sem hét Cortège.
RÍKHARÐUR
Í hvert sinn sem hann kom hér nið’rá torg
við hversdagsfólkið litum upp til hans:
Dánumaður mestur hér í borg
og mikil var hans reisn og elegans.
Við Ríkharð sáum aldrei angur tjá,
hann ávarpaði fólk og hélt sinn veg.
Þótt æðaslátt við enni mætti sjá,
alltaf var hans návist þægileg.