Andvari - 01.01.2014, Qupperneq 50

48
SVAVAR GESTSSON
ANDVARI
Lúðvík var ævinlega í neðri deild sem var alltaf aðaldeildin meðan
þingið var í tveimur málstofum; þar fóru fram pólitískar umræður um
alvörumál. Lúðvík vildi hvergi vera annars staðar. Hann var á þessum
tíma tvisvar sinnum ráðherra og aðeins einu sinni á tveimur kjörtíma-
bilum í stjórnaraðstöðu án þess að vera ráðherra, það var 1944-1947
og 1978-1979. A sínu síðasta þingi var hann reyndar í fyrsta og eina
skiptið á sínum þingferli nefndarformaður, þá í efnahags- og viðskipta-
nefnd neðri deildar. Hann sat næstum alltaf í efnahagsnefndum og í
sjávarútvegsnefndum. Örsjaldan í öðrum nefndum, einu sinni í land-
búnaðarnefnd en aldrei í menntamálanefnd, kennarinn sjálfur. Hann
fór í gegnum alþingiskosningar þrettán sinnum. Byrjaði í framboði
1937 og fékk 10,1% fylgis í Suður-Múlasýslu. Endaði með 36,5% 1978
í öllu Austurlandskjördæmi. Hann sat á 41 löggjafarþingi. Einn síðasti
miðinn sem hann skrifar og ég hef séð er frá 5. ágúst 1994. Þar skrifar
hann upp atkvæðatölur allra kosninganna sem hann tók þátt í. Höndin
er styrk og framsetningin örugg. Hann lést í nóvember sama ár.
Fyrsta þingmál Lúðvíks Jósepssonar var um beitumál sjávarútvegs-
ins. Það var tillaga til þingsályktunar um að fela ríkisstjórninni að und-
irbúa löggjöf um beitumál vélbátaútgerðarinnar, „og miði hún að því að
tryggja að ávallt sé til í landinu næg og góð beita við eðlilegu verði“.93
Fyrsta þingmál hins nýja þingmanns var tekið fyrir 16. desember 1942.
Fundurinn hófst með tilkynningu forsætisráðherra utanþingsstjórnar-
innar, Björns Þórðarsonar, um að ríkisstjórn hans hefði verið mynduð.
Sama dag var tillaga Lúðvíks á dagskrá. Hann flutti framsögu fyrir
tillögunni en enginn annar tók til máls. Þetta var jómfrúrræða hans
eins og það er kallað. Ræðumaður 28 ára að aldri. í tillögunni gerði
Lúðvík, 6. landskjörinn þingmaður, ráð fyrir því að Fiskifélagið væri
með í ráðum um að semja frumvarp til þessara beitulaga. Tillagan
kom úr nefnd því 28. janúar 1943 er málið aftur á dagskrá, nefndarálit
allsherjarnefndar um tillöguna er samhljóða og leggur nefndin til að
tillagan verði samþykkt með lítils háttar orðalagsbreytingu. Umræður
urðu nokkrar og nákvæmar: „Ef síld er þurrfryst, verður hún klakalaus,
en ef hún er vatnsfryst, verður það mestmegnis klaki, sem kaupandinn
fær sem síld...“94 sagði Sigurður Þórðarson. Pétur Ottesen og Gísli
Jónsson tóku þátt í umræðunni og að umræðu lokinni var tillagan sam-
þykkt. í lokaræðu sinni útskýrði Lúðvík hvað við var átt: Að keypt yrði
síld til beitu í stórum stíl, hún fryst og geymd og höfð til sölu handa
þeim sem þurftu. Þetta mætti til dæmis hugsa sér að Síldarverksmiðjur