Árbók Landsbókasafns Íslands - Nýr flokkur - 01.01.1976, Qupperneq 77

NORDAHL GRIEG OG FRIHETEN
77
sem hamingjurík heimkoma, draumur landnemanna eftir margra
vikna siglingu yfir stormasamt haf.“
Þegar Nordahl Grieg kemur hingað til lands öðru sinni, var hann
orðinn mörgum kunnur fyrir skáldskap sinn. Á íslenzku höfðu birzt
eftir hann kvæðið Vatnið í Alþýðublaðinu 1933 og Sikill í Rauðum
pennum 1935. Þýðandi var Magnús Ásgeirsson, og eru kvæðin end-
urprentuð í bók hans Þýdd Ijóð, 4. b. 1935, og auk þess er þar kvæð-
ið Skálinn á heiðinni. I Dvöl 1936 birtist kvæðið Reiðhjólið í þýðingu
Hrólfs úr Eyjum.
Eins og kunnugt er, hernámu Bretar Island 10. maí 1940. Mikið
hefur verið fjallað um hernaðarþýðingu landsins og svo er enn. Aíeð
samningi Islendinga við Bandaríkjamenn, sem þá voru ekki orðnir
þátttakendur í heimsstyrjöldinni, tóku þeir að sér hervernd íslands
frá 7. október 1941. Nokkrir Norðmenn komu til Islands eftir
ósigurinn í heimalandinu. Norska herdeildin var í öndverðu einungis
skipuð tólf mönnum. Smám saman fjölgaði þeim. Sjómenn sigldu
skútum sínum frá norðurslóðum til íslenzkra hafna. Með Bandaríkja-
mönnum komu síðar norskir flugmenn, sem höfðu aðalbækistöð á
Akureyri. Kjörorð norsku flugdeildarinnar var: „Gerið höfin trygg.“
Nordahl Grieg átti hér viðtal við íslenzka blaðamenn, kom fram
í útvarpi og las upp ljóð sín í hátíðasal Háskóla íslands. Honum
varð fljótt vel til vina. Ríkisstjórnin bauð honum að búa á Þing-
völlum. Hann kynntist íslenzkum leikurum, sem sendu Gerd sím-
skeyti og báðu hana að koma til íslands. Til Reykjavíkur kom hún
með „Lyru“ í júní, en þá var Nordahl Grieg farinn til Jan Mayen
í heimullegum erindum á vegum hersins. Ætlunin var að koma þar
upp sendistöð. Á Jan Mayen yrkir hann kvæðið 0ja i ishavet. Þessi
eru lokaerindin:
Land vort er útsker eitt
andviðra bækistöð,
dægur vort draumum svipt
drápið vort skyldukvöð,
svo megi framtíð frjáls
fagna við lauf og korn
heiðari og hlýrri öld
handan við feril vorn.
Hlutverk Gerd Grieg á Islandi var ekki einungis það að setja
leikrit á svið, heldur einnig að skemmta norskum hermönnum. Hún