Andvari - 01.01.2007, Side 45

ANDVARI
KATRÍN THORODDSEN
43
Katrín sagði að styrjöldin hefði legið „eins og helvítis mara" á heim-
inum, nú hlyti að styttast í lok hennar. Þá yrði spurt um fullveldi íslands
en landsmenn hefðu fengið að kynnast því hve dýrmætt mál- og prent-
frelsi væri. Hér var Katrín væntanlega að vísa til þess er Þjóðviljinn
var bannaður af bresku herstjórninni, ritstjórar blaðsins handteknir og
sendir til Bretlands í fangelsi.134 Síðan gagnrýndi Katrín þjóðstjórn-
arflokkana,135 þeim væri ekki treystandi fyrir framtíð landsins. Hún
spurði m.a. hvort þjóðin gæti treyst fiskbraskara [Ólafi Thors]. Hún
ræddi um meinta tryggð sósíalista við „Moskvulínuna“ og sagði að þar
væri verið að „reyna í framkvæmd það þjóðskipulag sem við teljum að
ráði bót á böli mannkynsins.“ Eina línan sem þaðan kæmi væri það sem
lesa mætti á prenti um þetta nýja kerfi. Sósíalisminn ætti eftir að flæða
eins og frelsisalda yfir Evrópu. Það er ljóst af ræðunni að aðalkeppi-
nauturinn var Alþýðuflokkurinn sem Katrín sagði þó deyjandi flokk.
Þar var formaður Stefán Jóhann Stefánsson sem svikið hefði launafólk
um styttingu vinnudagsins, sagði Katrín og tók dæmi af meðferð hans
á hjúkrunarkonum. Að lokum beindi Katrín orðum sínum sérstaklega
til kvenna og sagði:
Sósíalistaflokkurinn stefnir að því að allir fái sömu laun fyrir sömu vinnu.
Minnumst þess konur, og minnist þess líka að fullt jafnrétti fáið þið ekki
fyrr en í ríki sósíalismans. Þið eruð meiri hluti kjósenda og getið ráðið
þessu. Siðferðislega berið þið líka ábyrgð á ósómanum í opinberum málum.
Minnist þess að sósíalisminn stefnir að því að tryggja öllum örugga afkomu
en ánægjusamt og iðjusamt líf. Sama mark hafa öll góð heimili. Sósíalisminn
gefur fyrirheit um óteljandi þroskaleiðir, farsæld og velmegun. Er þetta ekki
mark sem vert er að stefna að og sem vert er að leggja lítilsháttar á sig til að ná.
Þú færist nær markmiðinu, kjósandi góður, með því að kjósa C-listann.136
Þannig talaði kvenréttindakonan og sósíalistinn Katrín Thoroddsen í
aðdraganda haustkosninga árið 1942. Ekki tókst að koma Katrínu á
þing að þessu sinni þrátt fyrir stórsigur Sósíalistaflokksins en hún varð
varamaður í Reykjavík og settist á þing árið 1945 í forföllum Einars
Olgeirssonar.137