Andvari - 01.01.2008, Blaðsíða 142
136
GERÐUR STEINÞÓRSDÓTTIR
ANDVARI
og Torfhildi Þorsteinsdætrum ár 1865.“ Frá Reykjavík lá leið Torfhildar til
Kaupmannahafnar þar sem hún lagði enn stund á hannyrðir og málanám. A
þessum tíma bjuggu Jón Sigurðsson og Ingibjörg kona hans við Austurvegg.
Ekkjan unga
Eftir heimkomuna gerðist Torfhildur heimiliskennari, en fluttist síðan með
Ragnhildi systur sinni og séra Eggerti Ó. Briem að Höskuldsstöðum á
Skagaströnd. Þar á Hólanesi var dönsk verslun og hét verslunarstjórinn Jakob
Holm. Hann var danskrar ættar en fæddur á Hólanesi. Móðurbróðir hans var
Pétur Havstein amtmaður á Möðruvöllum. Þau Torfhildur felldu hugi saman
og gengu í hjónaband 29. júlí 1873. Hjónabandið var skammvinnt því að á
brúðkaupsdaginn árið eftir lést Jakob, þrjátíu og fjögurra ára að aldri. Erfitt
er að gera sér grein fyrir áhrifum þessa missis á Torfhildi en ætla má að sú
sára reynsla hafi átt þátt í því hve henni var tíðrætt um fallvaltleika lífsins,
svo og þeirri miklu einmanakennd og sjálfsvorkunn sem kemur víða fram í
persónulegum skrifum hennar.
Torfhildur kynntist Rannveigu Briem, systur Eggerts, á Höskuldsstöðum.
Rannveig giftist Sigtryggi Jónassyni, sem var aðalhvatamaður að landnámi í
Nýja Islandi. Torfhildur hélt með þeim til Vesturheims 1876, en það ár fluttust
frá íslandi um 1200 manns. Torfhildur bjó fyrstu níu árin hjá Rannveigu. A
heimili hennar gat hún sinnt fræði- og ritstörfum og þar hófst höfundarferill
hennar.
Ritstörf í Vesturheimi
Torfhildur hóf að skrásetja þjóðsögur eftir frásögnum íslendinga, mest
kvenna, skömmu eftir komuna til Winnipeg en þær voru gefnar út löngu síðar
eða árið 1962 og sá Finnur Sigmundsson um útgáfuna. Fyrstu verk Torfhildar,
ljóð og smásögur, birtust í Framfara, fyrsta blaði íslendinga vestanhafs, undir
bókstafnum T, en Halldór Briem, bróðir Rannveigar, var ritstjóri blaðsins.
Fyrst á prent var kvæði, Kirkjugarðshugleiðing, sem birtist 17. apríl 1878. I
lesandabréfi í Framfara segir: „Allt það í Framfara sem T stendur undir er
honum til sóma.“ Einnig birtust ljóð og smásögur eftir Torfhildi í dönskum
og enskum blöðum í Winnipeg.
Torfhildur lauk við söguna um Brynjólf biskup Sveinsson 1880, eins og
áður hefur komið fram. Nokkuð dróst að fá hana gefna út, en Torfhildur
greiddi sjálf kostnaðinn. Bókin hefur tvívegis verið endurútgefin, 1912 og
1949. Sagan fékk misjafna dóma. Fyrsti ritdómurinn birtist í Þjóðólfi 1882