Kirkjuritið - 01.09.1950, Blaðsíða 61
PRESTASTEFNAN 1950
213
heilbrigðismál, er varða prestana nokkuð og starf þeirra. Eru
önnur lögin um dánarvottorð og dánarskýrslur, en hin um
ónæmisaðgerðir. Ég vil aðeins benda prestunum á þetta og
hvetja þá til þess að kynna sér ákvæði laganna, en þau koma
til framkvæmda frá 1. janúar 1951.
Frumvarp um kirkjuþing var ekki lagt fram á þessu þingi.
Stafaði það einkum af því, að eins og kunnugt er urðu tvenn
stjórnarskipti, á meðan þingað sat, og lengi mikil óvissa um
afgreiðslu þingmála. Þótti því réttara, að kirkjumálaráðherra
fengi tíma til að kynna sér þetta mál til næsta þings, og mun
ég vinna að því eftir föngum, að tryggja framgang þess á næsta
Alþingi, svo og annarra aðkallandi mála kirkjunnar, svo sem
endurreisn Skálholtsstaðar, sem ekki þolir langa bið úr þessu.
Eins og ég gat um áðan, eru samanlagðar fjárveitingar árið
1950 til bygginga og endurbóta á prestsetrum landsins aðeins
950 þúsundir króna. Er það 200 þúsund krónum lægri upphæð
en síðastliðið ár. Því miður varð engu um þokað til hækkunar
á þessum liðum. En bersýnilegt er, að við þetta er ekki hægt
að una framvegis, og þarf prestastéttin öll að leggjast á eitt,
til þess að vinna að auknum fjárveitingum til þessara mála
framvegis.
Samkvæmt skýrslu söngmálastjóra eru nú starfandi í land-
inu 139 kirkjukórar. Þar af hafa 7 verið stofnaðir á þessu
sýnódusári. Ennfremur var stofnað eitt kirkjukórasamband á
árinu, og eru þá komin á slík sambönd í öllum prófastsdæmum
landsins nema fjórum. Rúmlega 40 kirkjukórar héldu hljóm-
leika á árinu, sem yfirleitt voru mjög vel sóttir, og tvö söng-
mót voru haldin, annað í Rangárvallaprófastsdæmi, en hitt í
V.-Skaftafellsprófastsdæmi.
Söngskóli þjóðkirkjunnar var starfræktur í Reykjavík frá 1.
nóvember til 1. maí. Nemendur voru alls rúmlega 30, þar af
14, er sérstaklega lögðu stund á orgelleik. Tveir nemendur
lærðu orgelleik og bjuggu sig undir kirkjuorganistastörf og
nutu kennslu söngstjóra utan Reykjavíkur. Lærði annar á
Blönduósi, en hinn á Vopnafirði. Er þessi kennsla einnig á veg-
um söngmálastjórans.
Sex kirkjur fengu ný hljóðfæri á árinu. Hafa þá alls 32
kirkjur eignazt ný kirkjuorgel, síðan 1945.